Александра Алексеевна Посельская номнуо бэһис сылын Дьокуускайга баар “Аврора” мэдиссиинэ килииньикэтин “Көхтөөх уһун үйэлэнии” киинигэр хореограбынан үлэлээн, үөлээннээхтэригэр үөрүүнү бэлэхтиир. Кини биэнсийэҕэ тахсыар диэри оҕолору үҥкүү кэрэ эйгэтигэр, умсулҕаннаах абылаҥар уһуйбута. Билигин ол уопутун аҕам саастаахтарга тарҕатар.
“Мин үөлээннээхтэрбин үҥкүүгэ нэдиэлэҕэ үстэ кэлэн үөрэтэбин”, – диэн Александра Алексеевна сэргэх кэпсээнин саҕалыыр. – Биһиги уустуга суох, чэпчэки сүрүннээх саха үҥкүүтүн хамсаныыларын үөрэтэбит. Ол иһин сынньанааччыларбытыгар эрдэттэн сахалыы таҥаскытын илдьэ кэлиҥ диэн ыҥырабын. Отчуоттуур кэнсиэрбитигэр күргүөмүнэн үҥкүү туруорабыт. Үгүстэр аан бастакытын сыанаҕа тахсаллар, ол иһин сүрдээҕин долгуйаллар. Ол эрээри үксүн муусуканан хамсаналларын наһаа сөбүлүүллэр”, – диир.
Үҥкүүттэн ураты, “Көхтөөх уһун үйэлэнии” киинигэр “Кубулуйуу” (“Преображение”) диэн бырайыактаахпыт. Ол чэрчитинэн, бырайыак кыттыылаахтарыгар парикмахер уонна визажист кэлэн сэбэрэлэрин тупсараллар, ол кэнниттэн дискотекалыыллар уонна фотосессия оҥороллор.
Маны таһынан, манна толкуйу уонна өй үлэтин сайыннарар дьарыктар ыытыллаллар. Ол эрчиллиилэрин видео-уруоктарынан дьиэлэригэр салгыыллар.
“Көхтөөх уһун үйэлэнии” киинэ 2012 сыллаахха тэриллибит “Үһүс саас оскуолата” диэн социальнай-сырдатар бырайыагы кытары ыкса сибээстээх үлэлиир. Культмассовик Евгения Кирилловна Игнатьева ыҥырыытынан, көхтөөх уһун үйэлэнии тэрээһиннэригэр “Үһүс саас оскуолатын” айар кэлэктииптэрэ – “Иэйии”, “Айылҕан”, “Мэргэни” уонна “Сканди-бабушки” ансаамбыллар – кэнсиэрдииллэр. Бу кэлэктииптэр кыттыылаахтара “Биир ньыгыл Арассыыйа” уопсастыбаннай өйөбүл ыстаабын көхтөөх актыбыыстара уонна АБДь кыттыылаахтарыгар көмөлөһөр дьон.
“Биһигини араас тэрээһиҥҥэ куруук үөрэ көрсөллөр, – дииллэр “Үһүс саас оскуолатын” кыттыылаахтара. – Нэдиэлэҕэ биирдэ мустабыт, көстүүммүтүн бэйэбит тиктэбит уонна сыанаҕа тахсарбытыттан улаханнык дуоһуйабыт. Күннээҕи түбүктэн, сиэн көрөр дьоллоох, ол эрээри ардыгар сылаалаах эбээһинэстэн аралдьыйабыт, сынньанабыт. Биһигини оҕолорбут куруук өйүүллэр, ситиһиибититтэн үөрэллэр. Бары 69–80 саастаахпыт, оннооҕор аҕыс уоннарын ааспыт дьон бааллар. “Үһүс саас оскуолатыгар” кэлэн, үчүгэйдик билистибит. Онон эбэлэри, эһэлэри дьиэҕэ бүгэн олорбокко, биһиэхэ кэлиҥ, интэриэһинэй дьарыккытын булуҥ, саҥа дьону кытары билсиҥ, алтыһыҥ уонна биир санаалаахтар кулууптарыгар кыттыһыҥ диэн ыҥырабыт”, – дииллэр.
Киин сонуннарын
Майя АКИМОВА сырдатта.
"Аврора" мэдиссиинэ килииньикэтин "Көхтөөх уһун үйэлэнии" киинигэр бу нүөмэринэн суруйтарыаххытын сөп:
8-914-271-00-88
