Бу күннэргэ кэккэ улуустарга халлаан өссө сылыйыа, +35 кыраадыска тиийэ. Ол туһунан Гидромет-киин Саха сиринээҕи салаатын салайааччыта Татьяна Маршалик кэпсиир.
“Халлаан өссө сылыйыа эрээри, аһара куйаас күн өр туруо суоҕа. Дьокуускайга, илин эҥээргэ, киин улуустарга уонна Уус Майдаҕа бу сэрэдэҕэ уонна чэппиэргэ күнүс +30...+35 кыраадыс буолуоҕа. Өрөбүллэргэ ол куйаас Томпоҕо уонна Өймөкөөҥҥө көһөн тиийиэҕэ. Бүлүүгэ, соҕурууҥҥу улуустарга эмиэ балачча итийиэҕэ”, – диир Татьяна Маршалик.
Өрөспүүбүлүкэ хотугулуу-арҕааҥҥы улуустарыгар, ол кэннэ арҕаа өттүгэр куйаас от ыйын 8-9 күннэриттэн арыый уҕарыйан барыаҕа. Өрөбүллэргэ киин улуустар өрө тыыныахтара.
“Бээтинсэҕэ киин куоракка этиҥнээх ардах түһүөҕэ. Оттон субуотаҕа уонна өрөбүлгэ температура 10 кыраадыһынан түһэн, +20...+25 буолуоҕа. Ити кэннэ аһара куйаарара күүтүллүбэт. Өрөбүллэргэ киин улуустарга уонна Дьокуускайга былыт кэлиэҕэ, ардыа диэн сабаҕалыыбыт”, – диэн билгэһит этэн эттэ.
Эспиэр этэринэн, бу умайар уот куйаас салгын балаһата Саха сиригэр Приморьеттан кэлбит.
От ыйын 7 күнүнээҕи туругунан, Саха сиригэр 57 сиргэ ойуур умайар турар. Баһаар барыта кэриэтэ кураанах этиҥтэн сылтаан барбыт.
