Сарсын, бэс ыйын 9 күнүгэр, Өрөспүүбүлүкэ үгүс улууһугар этиҥнээх ардах уонна тыал түһэрэ күүтүллэр. Күн-дьыл туруга уларыйаары турарын туһунан Гидромет-киин Саха сиринээҕи салаата иһитиннэрэр.
Кэбээйигэ, Томпоҕэ, кэккэ киин улуустарга, ону тэҥэ Бүлүү сүнньүгэр, Ленскэйгэ уонна Өлүөхүмэҕэ ардах ыаҕастаах уунан кутуоҕа. Эдьигээҥҥэ эмиэ күүскэ ардыа, этиҥ кэмигэр сөкүүндэҕэ 17-22 миэтэрэ түргэннээх тыаллаах буолуо. Хотугу уонна хотугулуу-илиҥҥи улуустарга кыралаан ардыаҕа, түүнүн инчэҕэй хаар түһүө.
Сарсын өрөспүүбүлүкэ киин улуустарыгар күнүс +20...+25 кыраадыс сылаас, ардах кэмигэр салгын арыый сөрүүкүө, +15...+20 кыраадыс буолуо. Соҕуруу уонна соҕуруулуу-арҕаа куйаарар, +25...+30 кыраадыс буолара күүтүллэр. Хоту, хотугулуу-арҕаа уонна хотугулуу-илин +8...+13, сорох сиргэ +3...+8 кыраадыс сылаас.
Бу түүн Дьокуускайга +10...+12 кыраадыс сылаас. Сарсын күнүс этиҥнээх ардах түһүө, +21...+23 кыраадыс сылаас, сөкүүндэҕэ 15-20 миэтэрэ түргэннээх тыаллаах буолуо.
