“Сад памяти” – норуоттар икки ардыларынааҕы бырайыак. Бырайыак чэрчитинэн, Аҕа дойду Улуу сэриитин сылларыгар кыргыһыы толоонугар сырдык тыыннарын толук уурбут 27 мөлүйүөн буойуну кэриэстээн, 27 мөлүйүөн маһы олордор соруктаахтар. Устуоруйаны кэрэһилиир, дойдуга бэриниилээх буолуу тыынын уһугуннарар, онно эбии экологическай хабааннаах ыытыллар. Сүрүн сыала – кыргыһыы толоонугар охтубут хорсун буойуннар сырдык ааттарын үйэтитии уонна айылҕа чиҥ туруктаах буоларыгар, ойууру чөлүгэр түһэриигэ кылааты киллэрии.
Норуоттар икки ардыларынааҕы аахсыйаҕа кыттыһан, АЛРОСА Алмаас атыытыгар-эргиэнигэр дьарыктанар Дьокуускайдааҕы тэрилтэтин (ЯПТА) үлэһиттэрэ Дьокуускайга Кыайыы пааркатыгар хатыҥ, тэтиҥ уонна кедр мастары олортулар. Аахсыйаҕа судаарыстыбаннай былаас уорганнарын, уопсастыбаннай тэрилтэлэр, ыччат түмсүүлэрин бэрэстэбиитэллэрэ, волонтёрдар уонна уопсай дьыалаттан туора турбат куорат олохтоохторо кытыннылар. Уопсайа 200 киһи кыттыспыта үөрүүлээх. Аахсыйа кыттааччылара 300-тэн тахса маһы олортулар, буойуннар сырдык ааттарын үйэтитиигэ, айылҕаны харыстыырга тус кылааттарын киллэрдилэр.
“Айылҕаҕа харыстабыллаах сыһыаны уонна экологияҕа куттала суох буолууну хааччыйыы – биһиги хампаанньабыт үлэтин-хамнаһын биир сүрүн сыала-соруга. Тулалыыр эйгэҕэ ноҕуруусканы кыччатар технологиялары хампаанньа үлэтигэр көдьүүстээхтик туһанары таһынан үлэһиттэрбитин, кинилэр дьиэ кэргэннэрин, чугас дьоннорун кыттыһыннарга кыһаллабыт. Экологияҕа туһуламмыт бырагыраама уопсай сыала-соруга – үлэлиир эрэгийиэннэрбит ресурсаларын харыстыыр, ырааһы мэктиэлиир туһугар тыһыынчанан киһини түмүү”, – диэн “Союз машиностроителей России” ЯРО бэрэссэдээтэлэ, АЛРОСА толорооччу дириэктэрэ Сергей Павленко бэлиэтээтэ. Кини: – Аахсыйаҕа кыттыспыт дьоҥҥо барытыгар барҕа махталбытын тиэрдэбит. Хас биирдии саҥа олордуллубут мас чэчирии-чэлгийэ үүнэн, Аҕа дойду Улуу сэриитигэр охтубут буойуннарбыт сырдык ааттарын үйэтитэр тыыннаах туоһу буолуохтара диэн эрэнэбин, – диэн эбэн эттэ.
kyym.ru
