Бу нэдиэлэҕэ циклон барыта кэриэтэ Саха сирин тумнан ааһыа эрээри, өрөспүүбүлүкэ биирдиилээн улуустара ол сылаас салгын балаһатын син биир билиэхтэрэ. Оттон өрөбүллэр саҕана Дьокуускайга уонна киин улуустарга халлааммыт инньэ +10 кыраадыска тиийиэҕэ. Ол туһунан СИА-ҕа Гидромет-киин Саха сиринээҕи салаатын үлэһитэ Наталья Ковалева кэпсээбит.
“Түүҥҥү өттүгэр салгын температурата өрөспүүбүлүкэҕэ барытыгар биирин тэҥэ: -3...-8 кыраадыс тымныы, халлаан дьайҕаран ылар кэмигэр -10...-15 буолар. Күнүһүн эмиэ улахан араастаһыы суох, +3...+8 курдук. Арай киин улуустарга +4...+10 буолара күүтүллэр. Күүскэ ириэрэ турар, маннык халлаан нэдиэлэ бүтүөр диэри туруоҕа, сөҥүү түһэрэ сабаҕаламмат. Салгын ордук илин эҥээргэ уонна соҕуруулуу-илин сылыйыаҕа, +11 кыраадыс сылаас буолуо”, – диир Наталья Ковалева.
Төһө да бэтэрээ эҥээр арыый сылыйбытын иһин, Саха сирин хотугулуу-арҕаа өттүгэр халлаан арыый тымныйар чинчилээх. “Түүнүн -15...-20, оттон намтал сирдэргэ -22...-27 кыраадыс буолуоҕа. Күнүһүн эмиэ халбаҥныы сылдьар. Холобур, хоту өттүгэр -1...-6, соҕуруулуу-илин +3...+8 кыраадыс. Бу нэдиэлэҕэ циклон улахан аҥаарас өрөспүүбүлүкэ таһынан ааһыаҕа. Ол гынан баран, кэккэ улуустары, чуолаан соҕуруулуу-арҕаалары уонна соҕуруу эҥээри, ол циклон сиэлэ-кутуруга син биир таарыйыаҕа. Онон ол улуустарга кыралаан хаардыа”, – диир эспиэр.
Муус устар 23 уонна 24 күннэригэр соҕуруу, арҕаа уонна хотугулуу-арҕаа улуустарга кыралаан хаардыа, быыһыгар инчэҕэй хаар түһүө.
