Бу кэлбит тымныы күннэр нэдиэлэ бүтүөр диэри туруохтара. Онтон бэттэх халлаан эмиэ сааскылыы сылыйан барыаҕа. Ол туһунан Гидромет-киин салайааччыта Татьяна Маршалик СИА-ҕа кэпсээбит.
“Тымныы салгын балаһата арҕааттан кэллэ. Бүгүн оруобуна Дьокуускай үрдүгэр кэлэн турар. Онон бэҕэһээ +6 кыраадыс эбит буоллаҕына, бүгүн эмискэ -9-ска тиийдэ. Күнүһүн түүҥҥүтээҕэр да тымныйда”, – диир Т.Маршалик.
Күнү-дьылы кэтээн көрөөччү этэринэн, хаар бүгүҥҥүнэн түһэн бүтүөхтээх. Салгыы дьайҕаран ылар былыттаах күннэр туруохтара. Муус устар 1 күнүгэр, ол эбэтэр бүгүн, түүнүн биллэ тымныйыа.
“Муус устар 2 күнэ үүнэр түүнүгэр -20 кыраадыска тиийиэҕэ. Ол да кэннэ температура -15...-20 кыраадыс икки ардынан син турбахтыа. Дьиҥэр, бу кэмҥэ килиимэт бэйэтин төрүт нуормата -22 буолааччы”, – диэн эспиэр эбэн эппит.
Дьокуускай куоракка халлаан өрөбүлтэн, муус устар 5 күнүттэн, сылыйара күүтүллэр.
