АЛРОСА Экологияҕа киинэ уонна СӨ Биология ресурсаларыгар, ураты харыстанар сирдэргэ уонна аан айылгыларга дириэксийэтэ “Саха сирин тыыннаах алмаастара” айылҕа пааркатын өйөбүлүн кэҥэтэр сөбүлэһиини баттастылар.
2026 сыллаахха хампаанньа урукку сыллардааҕар элбэх үбүлээһини – 7 мөлүйүөн солкуобайы – бириэҕэ. Ол харчы кыылы-сүөлү табыгастаахтык көрөргө, аһылыгынан хааччыйарга уонна территорияны тупсарарга туттуллуо.
“Саха сирин тыыннаах алмаастара” паарка хампаанна өйөбүлүнэн тэриллибитэ. Паарка биһиги айылҕаҕа харыстабыллаах сыһыаммытын туоһулуур, Уһук Хотугу сир кыылын-сүөлүн арааһын билиһиннэрэр, – диэн АЛРОСА Экологияҕа киинин салайааччыта Анастасия Габрашитова кэпсээтэ. – Биһиги тыыннаах эйгэни билигин өйдөөтөхпүтүнэ эрэ үүнэр ыччат дьону айылҕаны арыстыырга үөрэтиэхпитин сөп”.
“Саха сирин тыыннаах алмаастара” айылҕа паарката – уопсайа 32 тыһыынча гаа иэннээх, Саха сиригэр Мииринэй оройуонугар баар, өрөспүүбүлүкэ суолталаах ураты харыстанар сир. Манна тыыннаах айылҕаҕа туйахтаах кыыл арааһа, ол иһигэр бизоннар, овцебыктар, яктар, кулааһайдар, сылгылар, эбирдээх табалар, ону сэргэ эһэлэр, көтөрдөр, ол иһигэр павлиннар уонна холууптар, дьиэтийэн үөскүүллэр. Паарка АЛРОСА көҕүлээһининэн тэриллибитэ. Онтон ыла хампаанньа дьиҥ таһымнаах успуонсар буолар.
Вольердары көрүүнү-истиини уонна саҥардыыны үбүлээһин – бу хампаанньа кыыл арааһын чөл тутарга уонна сөргүтэргэ киллэрэр кылаата. Пааркаҕа сыл аайы хас эмэ тыһыынча Мииринэй олохтооҕо уонна ыалдьыта кэлэн сынньанан, Саха сирин айылҕатын, кыылын-сүөлүн кытта билсэн барар.
Кыыл-сүөл арааһын харыстааһын АЛРОСА айылҕа харыстабылыгар анаммыт үлэтин биир сүрүн хайысхата. Аҥаардас 2024 сылга хампаанньа онно анаан барыта 96 мөлүйүөн солкуобайы, ол эбэтэр 2023 сыллаахтан 53%-нан элбэх харчыны, көрбүтэ. 2025 с. АЛРОСА “Саха сирин тыыннаах алмаастара” паарканы тупсаран оҥорууга анаммыт бырайыак куонкуруһун биллэрэн, бастакы миэстэни ылбыт киһиэхэ бырайыагын олоххо киллэрэригэр биир мөлүйүөн солкуобай суумалаах граны биэрбитэ.
kyym.ru
