“Новая фабрика звезд” кистэлэҥнэрин уонна бырайыак кэннэ олох туһунан
21 саастаах Анастасия Дьокуускайга улааппыта. Кыра эрдэҕиттэн фортепианонан, гимнастиканан, харбааһынынан, аты мииниинэн (верховая езда) дьарыктаммыта, омук тылларын үөрэппитэ. Уопсайынан, көхтөөх, барыны-бары билэ-көрө сатыыр оҕо этэ. Анастасия ити курдук кыратыттан көхтөөх буолан, Бэрэсидьиэн академиятын (РАНХиГС) түмүктүүр кууруһун уонна “Новая фабрика звезд” бырайыагы бэрт холкутук дьүөрэлээбитэ. Бырайыакка кыттыытын туһунан сиһилии – биһиги интервьюбутугар.
– Анастасия, бырайыакка хайдах тиийбиккиний?
– Эмиэ бары кыттааччылар курдук, кастинг туһунан истибитим, кавердары устубутум уонна анкыатабын ыыппытым. Кэлин “Мосфильмҥа” буолбут аһаҕас кастиҥҥа сылдьыбытым. Былааммын чугас дьонум, дьиэ кэргэним, доҕотторум да билбэттэр этэ. Кинилэри түбүгүрдүөхпүн, долгутуохпун баҕарбатаҕым.
– Бастакы биэриигэ эйигин сыанаҕа ыллыы-туойа үөрүйэҕэ суох кыттааччы курдук билиһиннэрбиттэрэ. Ол гынан баран, бэрт эрэллээхтик тахсан ыллаабытыҥ.
– Мин ханнык да таһымнаах куонкуруска уонна шоуга кытта үөрүйэҕэ суоҕум. Сыанаҕа тахсыахтааҕар буолуох, илиибэр микрофону даҕаны тута илигим. Онон, дьон үөрүйэх курдук көрбүттэриттэн, испэр сэмээр үөрэбин, астынабын. Ол аата мин, кырдьык, дьоҕурдаах буоллаҕым.
Вокалынан былырыын бэйэм бэйэбэр эрэ анаан дьарыктанар буолбутум. Ол сырыттахпына, үһүс дьарыгым кэмигэр уһуйааччым сатабылбын сыаналаан баран, “Новая фабрика звезд” кастинын туһунан кэпсээбитэ уонна холонон көрөрбөр этии киллэрбитэ.
– “Саҥа фабрикаҕа” ордук тугу өйдөөн хааллыҥ?
– Барыта бэрт тэтимнээхтик уонна ис хоһоонноохтук ааспыт буолан, барытын: дьарыктары, сыанаҕа тахсыыны, бырайыак үтүөкэн кэлэктиибин, настаабынньыктар десертэрин уонна кулун тутар 8 күнүгэр уолаттарбыт оҥорбут соһуччу бэлэхтэрин. “Саҥа фабрика” диэн – уһулуччу дьоҕурдаах, идэлэрин дэгиттэр баһылаабыт үһүс дьоннуун билсии. Сергей Шнуров уонна Сергей Жуков диэн кимнээҕин уонна кинилэр ырыаларын бары, бары буолбатах буоллаҕына, үгүс киһи билэр эбээт.
– “Ленинград” бөлөҕү уонна Сергей Шнуровы кытта биир сыанаҕа турар, бука, астык буолуо?
– Биллэн турар! Мин санаабар, ол туһунан үгүс сүгүрүйээччи, бэл, артыыс ыраланар буолуохтаах. Сергей Владимирович миигин өйөөбүтүттэн, биир сыанаҕа туран ыллаабыппытыттан олус астынабын. Мин санаабар, олус үчүгэй уонна интэриэһинэй дуэт буолбута.
– Эфирдэр быыстарыгар настаабынньыктаргытын кытта хайдах алтыһар этигит?
– Сергей Шнуров уонна Сергей Жуков биһиэхэ “сулустаах дьиэҕэ” ыалдьыттыы кэлэллэрэ. Иккиэн биһигини дьарыктыыллара, кэнсиэркэ бэлэмнэниини хонтуруоллууллара, сүбэлииллэрэ-амалыыллара, өйүүллэрэ.
– Шнур көннөрү олоҕор (сыанаҕа буолбатах) эмиэ элбэхтик маатыралыыр дуо?
– Саамай сүрүнэ “төһө элбэхтик буолбакка, хайдах уонна ханнык түгэҥҥэ” диэ! (күлэр).
– Оттон Жуковтыын ыллыаххын баҕарбытыҥ дуо?
– Биллэн турар. Сергей Жуков – номох буолбут киһи. Кини курдук таһымнаах артыыһы кытта биир сыанаҕа турар – үрдүк чиэс!
– Аркадий Евтушенконы кытта туох ситимнээххиний?
– “Новая фабрика звезд” барайыак бастакы күнүттэн чугастык доҕордоспуппут уонна билигин да билсэбит. Мин Аркашаны “братик” диэн ыҥырабын.
– Бырайыакка кыттыыгын хайдах сыаналыыгын?
– Барыта саҥа, саҥалыы этэ. Мин олох атын олоххо умсубутум. Бырайыак кэмигэр тугу билбиппин уонна туохха үөрэммиппин киһи ааҕан сиппэт. Аан бастаан сыанаҕа тахсан баран, “бу мин олоҕум дьыалата эбит” диэн өйдөөбүтүм.
– Ити курдук шоулар кэннилэриттэн социальнай ситимҥэ сурутааччы ахсаана көхтөөхтүк эбиллэн барааччы. Сэрэйдэххэ, тус бэйэҕэр (личкаҕа) эбэтэр пост таһаардахха суруйааччылар да, өйөөччүлэр эбэтэр үөхсээччилэр (хейт) да бааллара буолуо?
– Бастатан туран, биир дойдулаахтарбар олус элбэх уонна үтүө өйүүр тылларын иһин махталбын тиэрдэбин. Бастакы эфирим кэннэ тута эрийбиттэрэ уонна суруйбуттара. Тоҕо диэтэххэ, мин федеральнай теле-ханаалга тахсыым соһуччу этэ.
Биллэн турар, олус элбэх үөхсээччи да баара. Ол гынан баран, мин уйулҕам ону уйарыттан сөхтүм. Көр-күлүү курдук эттэххэ, үөхсүүттэн төрүөхпүттэн иммунитеттаах эбиппин. Мин кэлтэгэй тус көрүүлэрин бар дьон көрүүтүгэр суруйар, бэйэлэригэр куһаҕаны эрэ мунньар, атын дьон олоҕунан олорор дьону аһына саныыбын. Туох да диэбиттэрин иһин, мин барыларыгар чөл туругу уонна дьолу баҕарабын!
– Туох былааннааххын?
– Былааным баһырхай!
– Бүгүҥҥү күннээҕи олоххун ойуулаа эрэ.
– Күннэтэ араас дьыалам элбэх. Хас өрөбүл аайы нэдиэлэтээҕи былааммын оҥостобун. Былаан быһыытынан: үөрэх, вокал, успуорт, репетиторы кытта испания тылыгар дьарык. Мин санаабар, мин билигин бэйэм сайдыыбар күүскэ үлэлиэхпин, бириэмэни аныахпын наада. Билиҥҥитэ шоуга кыттыым кыраапыкпар улаханнык дьайбата.
– Иллэҥ кэмҥэр тугунан дьарыктанаҕын?
– Йоганы олус сөбүлүүбүн, үҥкүүлүүбүн, чугас дьоммун, дьоҕотторбун кытта кэпсэтэбин.
– Өтөр Дьокуускайга тус кэнсиэргин тэрийиэҥ дуо?
– Сыл аҥаарыгар биирдэ хайаан да дьиэ кэргэммэр барар үгэстээхпин. Чугас дьоммун кытта бириэмэни бииргэ атаарарым – миэхэ олус улахан суолталаах. Онон, хаһан эмэ Дьокуускайга кэнсиэрдээтэхпинэ, олус үөрүөм уонна дьоллонуом этэ. Даҕатан эттэххэ, Дьокуускайга “Якутск Сити Холл” арыллыытыгар биирдэ ыллыы сылдьыбытым.
– Кэпсэтиибит түмүгэр саҥа саҕалаан эрэр эдэр толорооччулар муусука бырайыактарыгар хайдах кыттыахтарын сөбүн туһунан сүбэлээ эрэ.
– Сөбүлүүр дьыалаҕытынан дьарыктаныҥ, сайда сатааҥ, хааччахха хаайтарымаҥ, айымньылаах үлэҕит түмүгүн дьоннуун үллэстиҥ! Оччоҕуна барыта кэмигэр кэлиэҕэ! Мин онно эрэнэбин! Ситиһиини, оҕолоор!
Андрей ШИЛОВ кэпсэттэ.
ТНТ пресс-сулууспатын хаартыскалара.
