Балаҕан ыйын 3 күнэ Саха сирин сахалыы тыллаах, сахалыы куттаах дьонугар курус сонуну аҕалла. Бүгүн уһун уонна ыарахан ыарыыттан Саха сирин уһулуччулаах учуонайа, бөлүһүөгэ, биллэр-көстөр уопсастыбаннай диэйэтэлэ, Ил Түмэн I уонна II ыҥырыыларын мунньахтарын норуодунай дьокутаата, социология билимин дуоктора, уйулҕа билимин хандьыдаата, профессор Ульяна Алексеевна Винокурова олохтон туораата.

Ульяна Алексеевна – Саха сирин билимин эйгэтигэр уонна духуобунаһыгар үйэлэргэ умнуллубат уһулуччу суолу-ииһи хаалларда. Кини аан бастакынан хотугу норуоттар уйулҕаларын (менталитеттарын) үөрэтиини төрүттээбитэ, Арктика цивилизациятын уонна криолитозонаҕа олох муудараһын (экософияны) чинчийиигэ сүүнэ кылаатын киллэрсибитэ. Циркумполярнай цивилизация билим өттүнэн чинчийэр киинин салайааччыта этэ. Билимҥэ үлэлиирин тухары 400-чэкэ билимҥэ сыһыаннаах улахан үлэни, 20 монографияны суруйбута. Кини быһаччы салалтатынан элбэх саха эдэр учуонайа уонна уһуйааччыта иитиллэн, үөрэнэн тахсыбыта.

Ульяна Винокурова бүтүн өрөспүүбүлүкэ тумус туттар ытык киһитэ, Саха Өрөспүүбүлүкэтин билимин үтүөлээх диэйэтэлэ, РФ бочуоттаах полярнига, Арассыыйа айылҕа үөрэҕэр билимин академиятын, Санкт-Петербурдааҕы Арктика билимин академиятын академиктара уонна бэйэтин төрөөбүт Орто Халыматын улууһун бочуоттаах олохтооҕо этэ.

Кини дириҥ ис хоһоонноох ыстатыйалара, кэскиллээх санаалара «Кыым» норуот хаһыатыгар бэчээттэнэн элбэх ааҕааччы кутун туппуттара, улахан сэҥээриитин уонна биһирэбилин ылбыттара. Кини олоҕун тиһэх күннэригэр диэри төрөөбүт дойдутун, Сахатын сирин уонна Арктика сайдыытын туһугар туруулаһан үлэлээбитэ.