Саха сирэ Арассыыйа эрэгийиэннэриттэн бастакынан бэйэтин төрөөбүт тылын, нуучча уонна английскай тыллары кытта тэҥҥэ улахан тыл оҥкулларыгар киллэрдэ.
Саха тылын ГигаЧакка өйөөһүн – биһиги тылбытын уонна култуурабытын харыстыырга, тарҕатарга улахан суолталаах хардыы, ону таһынан дьоҥҥо дьиҥнээх практическай туһаны аҕалар.
Билигин Саха тылынан оҥоһуу өй нөҥүө кэпсэтиэххэ сөп: информацияны көрдүөххэ, тиэкистэри бэлэмниэххэ, судаарыстыбаннай уорганнарга ыйытыы биэриэххэ, оҕолорго үөрэхтэригэр көмөлөһүөххэ сөп. Аҕа саастаах көлүөнэҕэ бу төрөөбүт тылынан сыыппара эйгэтигэр киирии аана. Ыччакка – оҥоһуу өй нөҥүө аныгы технологиялары баһылыыр кыах. Бу култуураны харыстыырга, көлүөнэлэр ыккардыларыгар билиини биэрэргэ уонна үөрэхтээһиҥҥэ, култуураҕа, туризмҥа, медиаҕа саха тылынан саҥа сервистэри сайыннарарга көмөлөһөр.
Бу технология толору бэйэбит оҥоһукпут, дойдубут киэнэ. Тас дойду платформаларыттан тутулуга суох, ол аата – эрэбиллээх уонна куттала суох. Оҥоһуу өйү үөрэтэргэ анаммыт дааннайдары СӨ Искусственнай интеллект лабораторията Хотугулуу-Илин федеральнай университет, СӨ Национальнай библиотеката, "Саха Бэчээт", "Сахамедиа", "Ситим-Медиа" ("Кыым" хаһыат, "Байдам" сурунаал) уонна М.А. Алексеев аатынан Үөһээ Бүлүүтээҕи республиканскай лицей-интернат бииргэ хомуйбуттара. Бу бииргэ оҥоруллубут киэҥ үлэ түмүгэр, архивнай уонна медиа матырыйааллары туһанан, оҥоһуу өй саха тылын үчүгэйдик өйдүүр уонна туттар буолла.
Саҥардыллыбыт оҥкулу босхо Android-ка RuStore уонна AppGallery сыһыарыыларынан, ону таһынан мессенджердэргэ босхо боруобалаан көрүөххэ сөп.
