Быйыл Саха сиригэр 26 оҕо судаарыстыба кэлим эксээмэнин (ЕГЭ) 100 баалга туттарда. Бастыҥ көрдөрүүлээх оҕолорунан Чурапчы улууһа иккис миэстэҕэ тахсыбыт. Ол туһунан Айсен Николаев “Якутия, веперд!” биэриигэ кэпсээтэ.
“Быйыл биһиги СКЭ-ни 100 баалга туттарбыт номнуо 26 оҕолоннубут. Ити өссө бүтэһиктээх түмүк буолбатах. Холобур, былырыын сүүс баалга 17 оҕо туттарбыта. Сүүс баалга суруйар оҕолор Дьокуускайга эрэ баар буолбатахтар. Быйыл Чурапчы улууһа аан бастакытын иккис миэстэҕэ таҕыста – кинилэр уһулуччу көрдөрүүлээх үс оҕолоохтор. Былырыыҥҥа диэри иккис миэстэҕэ Мииринэй уонна Нерюнгри оройуоннара сылдьыбыттара. Ити Чурапчы улууһугар үөрэх хаачыстыбатын тупсуута үтүө түмүктэри көрдөрөрүн туоһулуур. Тыа сиригэр даҕаны киһи үрдүк көрдөрүүнү ситиһиэн сөп”, – диэн Ил Дархан эттэ.
Ааспыт үс сыл иһигэр Саха сирэ үөрэх хаачыстыбатынан дойдуга 21-с миэстэҕэ тахсыбыт. Атын ханнык даҕаны эрэгийиэн ити курдук дьулурҕатык көрдөрүүтүн тупсара илигэ.
“Үс сыл анараа өттүгэр биһиги 70-с миэстэҕэ сылдьыбыппыт. Онтон 49 кэрдииһи көтөн, сулбурҕаччы 21-с миэстэҕэ таҕыстыбыт. Мин санаабар, ити үөрэххэ сыһыан тиһигэ төрдүттэн уларыйбытын туоһулуур. Сороҕор киһи хараҕар тута быраҕыллыбат да курдук буоллар, үөрэх эйгэтигэр күүстээх үлэ ыытыллар. Өрөспүүбүлүкэ педагогтара анаан-минээн дьарыктаналлар, бүгүн ол түмүгүн илэ көрөбүт”, – диир Айсен Николаев.
