Сарсыҥҥыттан, муус устар 1 күнүттэн, Саха сиригэр быйыл күһүн бастакы кылааска киирэр оҕолору оскуолаҕа суруйтарыы саҕаланар. Сайабылыанньаны өрөспүүбүлүкэ 36 муниципальнай тэриллиитигэр тутуохтара. Сайабылыанньаны ыытыы Дьокуускай бириэмэтинэн 9:00 чаастан саҕаланар.
СӨ үөрэххэ министиэристибэтэ иһитиннэрэринэн, оскуолаҕа суруйтарыы хампаанньата икки түһүмэхтээх буолуохтаах.
Бастакы түһүмэх – муус устар 1 күнүттэн бэс ыйын 30 күнүгэр диэри. Бу түһүмэххэ оҕолору олорор территорияларыгар баар (сыһыарыллыбыт) оскуолаларга суруйтараллар. Судургутук эттэххэ, “пропискалаах” сиригэр.
Иккис түһүмэх – от ыйын 6 күнүттэн балаҕан ыйын 5 күнүгэр диэри. Бу түһүмэххэ төрөппүттэр ханна олороллоруттан тутулуга суох, прописканан “кыаһыламмакка”, баҕалаах оскуолаларыгар сайабылыанньаны ыытыахтарын сөп. Бэлиэтээн эттэххэ, прописката суох оҕону атын оскуолаҕа миэстэ баар эрэ буоллаҕына ылаллар. Оттон миэстэ баарын-суоҕун туһунан иһитиннэриини оскуолалар от ыйын 5 күнүгэр диэри булгуччу таһаарыахтаахтар.
