Бу күннэргэ Дьокуускай дьаһалтата оттук дьыла хаһан саҕаланарын быһаарда. Дьаһалы көрдөххө, эмиэ урукку сылларга курдук, ититиини түһүмэҕинэн холбуохтара.
Ол курдук, балаҕан ыйын 1 күнүттэн ититиини социальнай тэрилтэлэргэ холбуохтара. Судургутук эттэххэ, оскуолаларга, балыыһаларга, уһуйааннарга, култуура уонна успуорт эбийиэктэригэр.
Оттон дьон олорор дьиэлэригэр балаҕан ыйын 5 күнүттэн ыытан барыахтара.
Ол гынан баран, өскөтүн биэс күн устата салгын орто температурата +8 кыраадыстан сөрүүкээтэҕинэ, ититиини халандаары күүппэккэ тута биэриэхтэрэ.
Кыым.ру
Хаартыска: СИА
