Булгунньахтаахха үлэлиир «Көхтөөх уһун үйэлэнии» киинэ «Кыым» хаһыаты кытта бииргэ үлэлээн, дьиҥнээх үтүө дьыаланы тэрийдэ. 2026 сыл иккис аҥарыгар хаһыаппытын суруттарбыт ааҕааччыларбытыгар анаан, «Ытык Арчы» алгыска аналлаах кэмпилиэги бэлэмнээһиҥҥэ киин сынньанааччылара көмөлөстүлэр.
«Кыым» хаһыат — саха киһитэ санаатын сааһылыырыгар, олох тускулун торумнууругар уонна санныгар биир хаары уулларан күөххэ үктэммитин бэлиэтииригэр куруутун эрэллээх доҕоро буолар. Бу үтүө суолу өйөөн, «Ытык Арчы» кэмпилиэги бэлэхтиир. Бу кэмпилиэк иһигэр кытыан, этиҥ охсубут маһа, ыраас туос уонна алгыстаах дьоҕус ыйынньык киирэллэр.
«Көхтөөх уһун үйэлэнии» киинин сынньанааччылара төрөөбүт тылбытын харыстыырга, кэлэр көлүөнэни иитиигэ улахан оруоллаахтарын күн аайы бэлиэтииллэр. Дьиҥэр, кырдьаҕастарбыт — биһиги баайбыт, кинилэр үйэлээх үгэстэри үйэтитэр күүстэрэ-уохтара биһигини күүстээх оҥорор.
Бу курдук кыһамньылаах сыһыан, алгыстаах бэлэх хаһыат сурутааччыларын өссө элбэтэ туруо, дьоммут-сэргэбит иллээхтик, этэҥҥэ олороллоругар тирэх буолуо диэн бигэ эрэллээхпит!
Бэй.кэр.
