2026 сыл атырдьах ыйын 29 күнүгэр 10:00 чаастан 17:00 чааска диэри А.Е. Кулаковскай аатынан Норуоттар доҕордоһууларын дьиэтигэр Саха сирин коллекционердарын 10-с үбүлүөйдээх сийиэстэрэ буолаары турар. Бу тэрээһин өрөспүүбүлүкэ биллэр араас малы-салы мунньааччыларын уонна энтузиастарын биир сиргэ түмэ тардыаҕа итиэннэ норуоттар доҕордоһууларын биир суолталаах бэлиэ түгэнинэн буолуоҕа.
Саха сиригэр “Култуура сылыгар” анаммыт тэрээһин коллекционердар быйыл сайыҥҥы көрсүһүүлэрин чаҕылхай түмүктээһининэн итиэннэ малы-салы мунньааччылар, эспиэрдэр, былыргыны сыаналааччылар уонна ыҥырыылаах ыалдьыттар икки ардыларыгар саҥа билсиһиилэр олохтоноллоругар үчүгэй төрүөт буолуоҕа. Сийиэскэ өрөспүүбүлүкэбит араас улуустарыттан олус ураты уонна дьикти малы-салы мунньар дьон кыттыахтара.
Дьаарбаҥкаҕа былыргы уонна аныгы манньыаттары, кумааҕы харчылары, маркалары, кэмбиэрдэри, оонньуурдары, уруучукалары, былыргы кэм малларын, сэдэх хаартыскалары, киэргэллэри уонна да атыны көрдөрүөхтэрэ. Бу тэрээһин көрөөччүлэргэ элбэх ураты малы биир сиртэн булан көрөргө сэдэх кыаҕы биэриэҕэ.
«Биһиги сийиэспит уратыта диэн араас коллекционнай мал быыстапкатын, дьаарбаҥкатын уонна араас таһымнаах коллекционердар бэйэ-бэйэлэрин кытта алтыһыыларын, көрсүһүүлэрин тэҥинэн тэрийэбит. Саамай сүрүнэ, бу тэрээһин – норуоттар доҕордоһууларын түһүлгэтэ буолуохтаах. Бу тиэмэҕэ анаан коллекционердар анал быыстапкалара тэриллэр, онно саамай бастыҥнар дьупулуомнарынан уонна мэтээллэринэн наҕараадаланыахтара», — диэн тэрийэр кэмитиэт бэрэссэдээтэлэ Андрей Шилов бэлиэтээтэ.
Кини этэринэн, сийиэс бары кыттыылаахтарыгар анал бэлиэ туттарыллыаҕа, ону аҕыйах тиражтаах тахсыбыт буолан, атын эрэгийиэннэр, бэл диэтэр, омук коллекционердара хайыы үйэ мунньунууларыгар ылаары көрдүү, сакаастаһа сылдьаллар үһү. Бу бэлиэ Саха Өрөспүүбүлүкэтигэр аналлаах фирменнай истиилгэ олоҕуран оҥоһуллубут. Ону тэҥэ быйыл Арассыыйа Почтатын кытта бииргэ үлэлэһэн официальнай аккырыыккалар тахсыбыттар, кинилэр филокартистар эрэ ортолоругар буолбакка, бары коллекционердарга үрдүктүк сыаналаналлар.
«Эдэр көлүөнэ култуурунай нэһилиэстибэни харыстааһын суолтатын өйдүүрэ уонна араас хайысхалаах коллекционирование көмөтүнэн бэйэ-бэйэни кытта уопсай тылы булар ордугун сыаналыы улаатара биһиэхэ олус суолталаах. Ол иһин сыл аайы бүтүн дьиэ кэргэнинэн кэлэр ыалдьыттарбытыгар өрүү үөрэбит. Оҕолор адьас былыргы маллары, араас дойдулар кумааҕы харчыларын мэлдьи олус интэриэһиргээн көрөллөр-истэллэр», — диэн Андрей Шилов кэпсээтэ.
Онон, атырдьах ыйын 29 күнүгэр, Дьокуускай куорат олохтоохторун уонна ыалдьыттарын Норуоттар доҕордоһууларын дьиэтигэр олус кэрэхсэбиллээх уонна сэргэх тэрээһиҥҥэ ыҥырабыт. Элбэҕи билэн-көрөн барыаххыт диэн мэктиэлиибит.
Kyym.ru
