2026 сыл, өрөспүүбүлүкэҕэ Култуура сылынан биллэриллибит сылга, оһуокай ураты суолтаны ылар
Ыам ыйын 25 күнүгэр Саха сиригэр Оһуокай күнэ бэлиэтэнэр. Өрөспүүбүлүкэ Ил Дархана Айсен Николаев олохтоохтору бу бырааһынньыгынан эҕэрдэлээн туран, Оһуокай – саха норуотун ытык үҥкүүтэ, олох үйэлээх эргиирин уонна көлүөнэлэр быстыспат ситимин бэлиэтэ буоларын эттэ.
Ытыктабыллаах Саха сирин олохтоохторо!
Саха Өрөспүүбүлүкэтин Оһуокайын күнүнэн итиитик-истиҥник эҕэрдэлиибин! Тыһыынчанан сыллар анараа өттүгэр үөскээбит, киһи сыһыанын баайын барытын иҥэриммит Оһуокай, биир санааҕа түмэр күүстээх. Бу үйэлэртэн кэлбит сыаналаах нэһилиэстибэ, норуокка саҥа ситиһиилэргэ уонна кыайыыларга тыыннаах күүһү биэрэр. Илиилэрбититтэн ыга тутуһан, биир күүспүтүнэн биһиги киэҥ Сахабыт сирин, кини бүгүҥҥү уонна кэлэр дьоллоох олоҕун кэрэтин, улуутун ырыаҕа ыллаабыппыт. Оһуокай элбэх бырааһынньык арахсыспат сорҕото буолла. Быйыл Оһуокай күнүн үһүс төгүлүн бэлиэтиибит. Сахалыы төгүрүк үҥкүү өрөспүүбүлүкэ тыһыынчанан олохтоохторун – төрүт үгэстэригэр күүстээх дьону, кэлэр кэмҥэ эрэллээх үлэһиттэри уонна Дойдуларын көмүскээччилэрэ, кыайыы өттүгэр туруммут дьоруойдары – эмиэ биир сомоҕоҕо түмүөҕэ.
Өрөспүүбүлүкэҕэ төрүт үҥкүүбүтүн харыстыырга уонна сайыннарарга күүстээх үлэ барар. 2026 сыл – Култуура сылыгар – бу ураты суолтаны ылар. Арассыыйа Бэрэсидьиэнэ Владимир Путин өрөспүүбүлүкэбит төрүт култууратыгар элбэхтэ сүгүрүйэн турардаах. Дойду баһылыга саха норуотун ырыаһыт майгытын, дириҥ норуот култууратыгар бэриниитин бэлиэтиир. 2022 сылтан төрүт култуура нэһилиэстибэтин илдьэ сылдьааччылары судаарыстыба өйүүрүнэн, Саха Өрөспүүбүлүкэтин баһылыгын истипиэндийэлэрэ туттарыллар буоллулар. Ааспыт сылга итинник истипиэндийэлэр Оһуокай таһаарааччыларыгар Тамара Дмитриеваҕа, Валентина Дьячковскаяҕа, Егор Егоровка, Светлана Зедгенидзеваҕа, Дмитрий Ивановка, Светлана Ивановаҕа, Айталина Мойтохоноваҕа туттарылыннылар. Төрүт уҥкүүбүтүн харыстыырга уонна сайыннарарга Комплекснай былаан оҥоһуллубут, оһуокай таһаарааччылар айар мастарыскыайдара тэриллибиттэр. Өрөспүүбүлүкэ олоҕор Оһуокай үҥкүүтүн толоруу үгэстэрин харыстыырга уонна үөрэтэргэ тыл уонна култуура нэһилиэстибэтин сыыппаралыыр Кииҥҥэ сыыппара архыыбын тэрийии – ураты суолталаах түгэн буолла. Ону таһынан, Оһуокайы харыстааһыҥҥа, сөргүтүүгэ уонна салгыы сайыннарарга анаммыт билимҥэ олоҕурбут-популярнай энциклопедияны бэлэмнээһин көрүллүбүт.
Оһуокай таһаарааччыларын – төрүт култуура нэһилиэстибэтин илдьэ сылдьааччылар – кыттыыларыгар киинэлэри, телевизионнай култуура-үөрэх бырайыактарын уонна араадьыйа биэриилэрин оҥорон таһаарыы эмиэ бара турар. Оһуокай үҥкүүтүн төрүт толоруллар сирдэрин хабар култуура-туризм маршруттарын оҥоруу, ону таһынан муниципальнай тэриллиилэр сирдэринэн үҥкүү араас көрүҥнэрин чопчулааһын уонна бэрээдэктээһин сыаллаах «Түөлбэ оһуокайа» эспэдииссийэлэри тэрийии салҕанар. Уонна, биллэн туран, Оһуокайы сайыннарыыга уонна киэҥник тарҕатыыга туһуламмыт сыллата ыытыллар аан дойдутааҕы, бүтүн Арассыыйатааҕы, өрөспүүбүлүкэтээҕи, оройуоннааҕы, куорат уонна бөһүөлэк таһымнаах күрэхтэһиилэр, бэстибээллэр уонна култуура-үөрэх акциялара сүрүн хайысханан хаалаллар. Арассыыйа норуоттарын сомоҕолоһуутун сылыгар, өрөспүүбүлүкэҕэ Култуура сылыгар Оһуокай Саха сирин олохтоохторугар саҥа ураты суолтаны ылар, АБДь Кыайыы иһин охсуһууга, кырдьыкка дьулуһууга норуот сомоҕолоһуутун көрдөрөр.
Күндү өрөспүүбүлүкэбит олохтоохторо! Бу бырааһынньык күн барыгытыгар чэбдик санааны, доҕордоһууну, үтүөнү уонна Сахабыт сирин, улуу дойдубут – Арассыыйа – чэлгийэ сайдарыгар туһуламмыт айымньылаах, таһаарыылаах үлэни баҕарабын!
Оһуокай күнүнэн!
Саха Өрөспүүбүлүкэтин Ил Дархана Айсен Николаев
Хаартыска: “Ситим” медиа-бөлөх.
