2026 с. тохсунньутуттан саҕалаан бэс ыйыгар диэри Саха сирин олохтоохторо Арассыыйа бааныгар 800-тэн тахса үҥсүүнү ыыппыттар. Ити былырыыҥҥыны кытта тэҥнээтэххэ 64%-нан элбэх. Ол туһунан Киин баан Саха сиринээҕи салаата иһитиннэрэр.
Дьон сүрүннээн бааннары үҥсэр эбит – оннук 370 үҥсүү киирбит (былырыыҥҥыттан 46%-нан эбиллибит). Потребительскай кирэдьииккэ сыһыаннаах 1,5 төгүл элбэх үҥсүү киирбит, оттон ипотекаҕа – 2,7 төгүл. Саха сирин олохтоохторо үксүгэр “иэһи төлүүр уустугун”, “эбии өҥө иһин төлөммүт харчыны төннөрөр”, “кирэдьиит каникулун”, ону тэҥэ “эбии өҥөнү соҥнуулларын сөбүлээбэккэ”, о.д.а. суруйбут.
19%-нан (аҕыс уонна) расчетнай счекка сыһыаннаах үҥсүү эбиллибит. Страховкалааччыларга 40 үҥсүү киирбит – былырыыҥҥыттан балачча элбэх. Үгэс курдук, үҥсүү баһыйар өттө ОСАГО-ҕа сыһыаннаах.
Дьоҕус кирэдьииттиир тэрилтэлэргэ сыһыаннаах үҥсүү-харчыы 63%-нан элбээбит – 160 буолбут.
Арассыыйа баанын Саха сиринээҕи салаатын салайааччыта Антон Коноплев этэринэн, үп тэрилтэтин кытта мөккүөр үөскээтэҕинэ, бастатан туран, ол тэрилтэҕэ бэйэтигэр сурук суруйуллуохтаах.
“Өскөтүн ол кэннэ 15 үлэ күнүн иһинэн хоруйу туппатаххытына эбэтэр кыһалҕаны сатаан быһаарбатаххытына, үҥсүүнү Арассыыйа бааныгар суруйуҥ. Балаһыанньаны быһаарыҥ, бигэргэтэр докумуоннары сыһыаран ыытыҥ”, – диир кини.
