Саха сирин Арассыыйа уон муҥур элбэх хамнастаах эрэгийиэнин ахсааныгар киллэрдилэр. Өрөспүүбүлүкэ олохтооҕун 40,9 %-на (аҥарын кэриэтэ) дойду орто хамнаһыттан биллэ үрдүк хамнастааҕын туһунан суруйбуттар.
Итинник диэн көрдөрөр-иһитиннэрэр эйгэҕэ дойду биир саамай бөдөҥ ааҕыныстыбата – “РИА Сонуннара” анал чинчийии оҥорон ааҕан таһаарбыт. Онно Арассыыйа бары эрэгийиэннэрин үлэһит араҥатын хамнаһын олохтоох сыана таһымын кытта учуоттаан, тэҥнээн аахпыттар, итиэннэ сыаналааһын кэрдииһин (рейтинг) оҥорбуттар.
Чинчийии түмүгүнэн, Саха Өрөспүүбүлүкэтин үрдүк хамнастаах эрэгийиэннэр ахсааннарыгар тохсуһунан киллэрбиттэр, о.э. олохтооҕун 40,9 %-на дойду орто хамнаһыттан элбэх хамнастааҕа көстүбүт.
Рейтинг маннык буолан тахсыбыт:
Ямал-Ненец автономнай уокурук (65,8 %)
Магадан уобалаһа (57,2 %)
Чукотка (56,5 %)
Балары Ненец автономнай уокуруга, Ханты-Манси автономнай уокуруга, Сахалин уобалаһа, Санкт-Питербург уонна Москуба тилэх баттаһа сылдьаллар.
Ону тэҥэ, дойду үрдүнэн икки орто хамнастан элбэҕи ылар үлэһит ахсаанынан Саха сирэ эмиэ чорбойбут. Ямал-Ненец автономнай уокуругар, Чукотка, Москуба, Магадан уобалаһыгар, Ненец уокуругугар, Сахалин уобалаһыгар эрэ хотторбут.
Санатан эттэххэ, 2025 сыл түмүгүнэн Арассыыйаҕа орто хамнас 100 тыһ. солк. куоһарбыта. Оттон 2026 сылга – 108 тыһ. солк. тэҥнэспит. Онон, быйыл хамнас 14,3 % үрдээтэ диэн суоттууллар. Үлэтэ суох буолуу – 2,2 % диэри кыччаабыт.
Оттон эһиги, ааҕааччыларбыт, туох дии саныыгыт? Элбэх хамнастаахпыт диэн сананаҕыт дуо?
Бэй. кэр.
Хаартыска: АиФ Челябинск.
