Ыстаап балаһыанньа көнүөр, уматык кыһалҕата сүтүөр диэри үлэлиэхтээх.
Ил Дархан Айсен Николаев дьаһалынан Саха сиригэр уматык боппуруоһун сүрүннүүр уонна быһаарар суһал ыстаап тэрилиннэ. Салайааччынан Дмитрий Садовников ананна. Ыстаап балаһыанньа көнүөр, кыһалҕа сүтүөр диэри үлэлиэхтээх.
Бастакы мунньахха Дмитрий Садовников тыын суолталаах тэрилтэлэр уматыгынан булгуччу хааччыллыахтаахтарын эттэ.
– Бастатан туран, уматыгы тыын суолталаах судаарыстыбаннай уонна муниципальнай тэрилтэлэргэ ыытыахпыт. Ол иһигэр суһал көмө сулууспаларыгар, хотугу улуустарга айанныыр таһаҕасчыттарга, дьону тиэйэр-таһар оптуобустарга, тимир, уу суолун тырааныспарыгар, ону сэргэ тыаһа хаһаайыстыбатын оҥорон таһаарааччыларыгар, – диэтэ вице-премьер.
Онон улуустар ааҕан-суоттаан баран, төһө-хас кээмэйдээх уматыкка наадыйалларын биллэриэхтээхтэр. Ону туһааннаах министиэристибэлэр ыстаап көрүүтүгэр киллэриэхтээхтэр. Ыстаап балаһыанньаны күннэтэ кэтии-көрө олорор.
Санаттахха, от ыйын 24 күнүгэр дойду бырабыыталыстыбатын бэрэссэдээтэлин солбуйааччыта Александр Новак салайааччылаах улахан мунньахха “Саха сиригэр уматык булгуччу биир бастакынан тиэрдиллиэхтээх (240 тыһ. туонна)” диэн буолбута.
