“Саханефтегазсбыт” тэрилтэ көлө уматыгын кээмэйдээн-кэмчилээн атыылаан эрэр. “Туймаада-ньиэпкэ” эмиэ оннук хааччах киирдэ, бонус тиһигин үлэтэ тохтоото. СӨ гражданскай оборуонаҕа министиэристибэтэ “бу миэрэ аймалҕан үөскээбэтин туһугар оҥоһуллар” диэн сырдатар.
Ити курдук хааччахтааһыннар Саха сирин таһынан Забайкальеҕа, Дагестаҥҥа, Ульяновскай, Курган уобаластарыгар уо.д.а. сирдэргэ киирбиттэр. Суруйалларынан, хаччахтааһын дьон ордук айманар, ажиотаж буолар сирдэригэр, ол эбэтэр Нерюнгри, Алдан, Мэҥэ Хаҥалас, Нам, Хаҥалас, Ленскэй, Уус Майда эрэ сапыраапкаларыгар олохтоммут.
“Саханефтегазсбыт” сапыраапкаларыгар биир тиэхиньикэҕэ 30 лиитэрэ бэнсиини, 200 лиитэрэ сэлээркэни куталлар. “Туймаада-ньиэптэр” – 20-лии лиитэрэ бэнсиини. Иһиккэ-хомуоска куттар ханнык да сапыраакаҕа көҥүллэммэт буолбут.
“Биллэн турар, улахан кыһалҕаттан ити курдук миэрэ ылыллынна. Ол гынан баран, ньиэп бородууктатын ырыынагар балаһыанньа көннөҕүнэ, өтөр барыта оннугар түһүөҕэ. Бука диэн өйдөөҥ”, – диэн Дмитрий Лепчиков көрдөһөр.
Санаттахха, дойдуга уматык боппуруоһун дойду бэрэсидьиэнэ Владимир Путин бэйэтинэн хонтуруоллуур. От ыйыттан барыта көнүөхтээх.
