Дьокуускайга суут бириистэптэрэ биир быраастан СӨ доруобуйа харыстабылын министиэристибэтигэр 1,7 мөлүйүөн солкуобай иэстээҕин иһин массыынатын былдьаатылар.
Эр киһи хайаан да үлэлиэм биэс сыл болдьохтоох мэдиссиинэ тэрилтэтин кытта “Земскэй дуоктар” бырагырааманан дуогабар түһэрсибит. Ол иһин тута 2 мөлүйүөн солкуобайы ылан сиэбигэр уктубут эрээри, саҥа сиргэ тиийэн сылы да кыайбат үлэлээн баран, уурайан хаалбыт. Харчыны төннөрбөппүн диэбит. Онон Доруобуйа харыстыбылын министиэристибэтэ суукка үҥсүбүт.
Биллэн турар, суут харчы иэһин толуйтарарга уураахтаабыт. Ол гынан баран, быраас болдьохтоох кэмҥэ онтун төлөөбөтөх. Ол иһин оросчуоттаах счеттарын туппуттар, икки массыынатын уонна түөрт хамсаабат баайын регистрациялыыры уонна Арассыыйа таһыгар тахсарын боппуттар. Эр киһи ити да дьайыыга сөп буолбатах. Инньэ гынан, бириистэптэр аны “Ниссан Икс-Трейл” массыынатын туппуттар. Өскөтүн быраас бу сырыыга иэһин төлөөбөтөҕүнэ, массыынатын сыаналаан баран судаарыстыба туһугар атыылаан кэбиһиэхтээхтэр.
