Дьокуускай суута Дьокуускай үөрэххэ управлениетын каадырга отделын 63 саастаах салайааччытын 20 тыһыынча солкуобайга ыстарааптаата. Хотун бииргэ үлэлиир хат дьахтарын сынньыбыт. Ол туһунан муус устар 20 күнүгэр СӨ сууттарын пресс-сулууспата иһитиннэрдэ.
Дьахталлар өссө тохсунньу 12 күнүгэр иирсибиттэр. Этиһэ туран, салайааччы үлэһитин харытын бобо туппут. Ол түмүгэр эмсэҕэлээччи илиитэ хайа тардыллыбыт-дьуккуруйбут уонна көҕөрөн тахсыбыт. Онтун ааһан, быһыылаан кэннэ хат дьахтар оҕото куотар куттала үөскээн, больничнайга барбыт.
Салайааччы буруйун тута билиммит. Ол гынан баран, этиһэ туран кыайан туттумматаҕым, соруйан гымматаҕым диэбит. Тэрилтэтэ үлэһитин сэмэлээбит. Оттон суут кинини РФ КоАП 6.1.1 ыст. буруйдаабыт (доруобуйаҕа буортуну оҥорботох эрээри, эти-сиини ыарытыннарбыт сынньыы – побои).
Дьахтар буруйун толору билиммитинэн, бастакытын оҥорбутун, кырдьаҕаһынан, о.д.а. төрүөтүнэн накаастабылын сымнаппыттар.
