Бастыҥ сүүрүкпүт Сардаана Трофимова балаҕан ыйын 20 күнүгэр – сыл саамай эппиэттээх күрэхтэһиитигэр кыттыахтаах.
Кини Москуба марафонугар үһүс төгүлүн кыттаары сылдьар. Икки бастакы кыттыыларыгар (2017 уонна 2018 сыллардаахха) бастаабыта. 2017 сыллаахха көрдөрбүт бириэмэтэ – 2 чаас 30 мүнүүтэ 29 сөкүүндэ. Эһиилигэр ити көрдөрүүтүн тупсарбыта – 2 чаас 28 мүнүүтэ 35 сөкүүндэ. Былырыын эмиэ Москуба марафонугар кыттаары бэлэмнэнэ сырыттаҕына олус соһуччу нейтральнай статус биэрэннэр – Катарга ыытыллыбыт аан дойду чөмпүйэнээтигэр кыттыбыта.
Бу нэдиэлэ оптуорунньугар (балаҕан ыйын 15 күнүгэр) Сардаана Трофимованы кытта төлөпүөнүнэн кэпсэтэ сырыттыбыт.
– Сардаана, билигин ханна бааргыный? Москубаҕа дуу, Кисловодскайга дуу?
– Кисловодскайга. Бу сайын манна хас да түһүмэхтээх үөрэтэр-эрчийэр тэрээһин ыытылынна. Урут баччаларга наар Кыргызстаҥҥа дьарыктанааччыбын. Быйыл пандемиянан сибээстээн ити дойдуга барар кыаллыбата. Онно муора таһымыттан 1 600 миэтэрэ үрдүк сиргэ дьарыктанар этибит. Оттон Кисловодскай муора таһымыттан 900 миэтэрэ үрдүккэ турар. Онон дьарыкпыт былаана да тосту уларыйда. Налыы сиргэ дьарыктаныы атыннык ыытыллар.
Кисловодскайга үчүгэйэ диэн түһүүлээх-тахсыылаах тыраассаҕа дьарыктанабыт. Москуба марафонун тыраассата эмиэ элбэх түһүүлээх-тахсыылаах. Москубаҕа күрэхтэһии саҕаланыа биир-икки хонук иннинэ көтүөхтээхпит.
– Марафоҥҥа чопчу бириэмэни көрдөрөр туһугар былааннаах үлэ ыытылыннаҕа?
– Оннук. Москуба марафонун тыраассатыгар World Athletics (чэпчэки атлетикаҕа аан дойду федерацията) сэртипикээтэ баар. Ол иһин күрэхтэһиигэ сүрүн сыалым-соругум – Олимпиада нормативын толоруу (2 чаас, 29 мүнүүтэ, 30 сөкүүндэ). Миигиттэн, спортсментан, туох ирдэнэрин толоро сатыам. Онтон атына барыта – мин кыаҕым таһынан буоллаҕа.
– Арассыыйа чэпчэки атлетикатын биир да бэрэстэбиитэлигэр нейтральнай статуһунан күрэхтэһэр быраап бэриллэ илик дии?
– Суох. Сайын саҕаланыыта Арассыыйа 5 мөлүйүөн дуоллар ыстараап төлүөхтээҕин туһунан кэпсэтии-ипсэтии бөҕө буолбута. Аны Токио Олимпиадатыгар Арассыыйаттан 10 эрэ чэпчэки атлетика бэрэстэбиитэлэ кыттыахтаах. Бүгүҥҥү туругунан биир да спортсмен аата ааттана илик. Мин Олимпиадаҕа барар хамаанда састаабыгар киирэргэ тиһэҕэр дылы туруулаһыам.
– Сардаана, улахан күрэхтэһиилэргэ кыттыбатаҕыҥ ыраатта. Төһө долгуйаҕын?
– Кырдьык, күрэхтэһиигэ кыттыбатаҕым ыраатта. Сыл буолара да буолбут. Бүтэһик төгүлүн былырыын Катарга ыытыллыбыт аан дойду чөмпүйэнээтигэр кыттыбытым.
Быйылгы Арассыыйа чөмпүйэнээтэ муус устарга ыытыллыахтааҕа. Онтон, баҕар, ыам ыйыгар көһөрдөхтөрө диэн кэтэспиппит. Итинник көстөр көһөн, Арассыыйа марафоҥҥа чөмпүйэнээтэ барыллаан былаан быһыытынан, ахсынньыга Сочига ыытыллар буолла. Онно хайаан да кыттыахтаахпын.
– Сардаана, эн Москуба марафонугар үһүс төгүлүн кыттаары сылдьаҕын. Марафон тыраассата уларыйбат буоллаҕа?
– Оннук, уларыйбат. Ыстаарт сырыы аайы “Лужники” успуорт комплексын аттыгар турар Фестиваль болуоссатыттан саҕаланааччы. Мэлдьи буоларын курдук Москуба киин уулуссаларынан сүүрүөхтээхпит.
– Дьахталлар күрэхтэһиилэригэр күүстээх сүүрүктэртэн кимнээх кытталларый?
– Кыттааччылар испииһэктэрэ суох эрээри, кимнээх кыттыахтарын сөбүн билэбит. Курскай сүүрүгэ, аан дойду кылаастаах успуорт маастара Ирина Сергеева кыттара буолуо. Кини марафоҥҥа былырыыҥҥы Арассыыйа чөмпүйэнээтигэр мин кэннибиттэн кэлбитэ, күрэхтэһии үрүҥ көмүс призерунан буолбута. Омскай сүүрүгэ Марина Ковалева кыттыа диэн сабаҕалыыбыт. Кини – былырыыҥҥы Москуба марафонун кыайыылааҕа. Көрдөрүүтэ – 2 чаас 29 мүнүүтэ 26 сөкүүндэ.
Чувашия сүүрүгэ Алина Прокопьеваны өйдүүргүт буолуо. Сыл аайы марафоҥҥа Арассыыйа чөмпүйэнээтигэр кыттар, миэстэлэһэр. Холобур, икки сыллааҕыта Волгоградка ыытыллыбыт Арассыыйа чөмпүйэнээтигэр миигиттэн балтараа мүнүүтэнэн хаалан иккис призерунан буолбута.
Соторутааҕыта (балаҕан ыйын 6 күнүгэр) Пермь куоракка марафон ыытыллыбыта. Онно дьахталлар сүүрүүлэригэр Луиза Дмитриева (Москуба уобалаһа) уонна Алина Прокопьева Олимпиада нормативын толорбуттара. Көрдөрүүлэрэ: Дмитриева – 2 чаас 28 мүнүүтэ 35 сөкүүндэ; Прокопьева – 2 чаас 29 мүнүүтэ 9 сөкүүндэ. Ол гынан баран Пермь сүүрэр тыраассатыгар World Athletics сэртипикээтэ суох.
– Сардаана, “Кыым” ааҕааччыларын аатыттан ситиһиини баҕарабыт!
