Бырабыыталыстыба дьиэтигэр Арассыыйа дьоруойдарын Филипп Евсеевы уонна Алексей Неустроевы чиэстээһиҥҥэ «Алеша» тааҥка дьоруойдарыгар анаан айыллыбыт ырыа бастакытын ылланна. Ырыаны Саха сирин норуодунай артыыһа Александр Емельянов толордо.
СӨ култуураҕа уонна духуобунай сайдыыга миниистирин солбуйааччыта Марина Силина иһитиннэрбитинэн, ырыа тылын Валентина Комиссарова-Күлүмүрэ суруйбут, матыыбын Саха сирин норуодунай артыыһа Алексей Калининскай-Луҥха айбыт.
«Ырыа, саҥа айыллыбыт буолан, чиэстээһиҥҥэ байаан доҕуһуолунан ылланна. Салгыы Опера уонна балет тыйаатыра ырыаны аркыастыр доҕуһуолунан ыллаан уһултарар, киэҥ эйгэҕэ таһаарар баҕалаах», - диэн Марина Силина кэпсээтэ.
Сонун төрдө: СӨ Култуураҕа уонна духуобунай сайдыыга министиэристибэтин пресс-киинэ