«Күн оҕолоро» айар бөлөх режиссера Сардаана Барабанова документальнай-анимационнай «Сэрии оҕолоро» (Дети войны) киинэтэ Аҕа дойду сэриитигэр аналлаах IX «Перерыв на кино» тэттик киинэ бэстибээлин шорт-лииһигэр киирдэ.
Киинэҕэ уруһуй уонна анимация көмөтүнэн Саха сиригэр сэрии оҕолорун кэпсээннэрин тилиннэрдилэр. Дьоруойдарынан сэрии кэмигэр 6 - 14 саастаах Таатта улууһун оҕолоро буоллулар. Кинилэр аччыктааһыны, тыйыс тымныылары тулуйбуттара, улахан дьону кытта тэҥҥэ үлэлээбиттэрэ, чугас дьоннорун сүтэрбиттэрэ, элбэх өлүүнү көрбүттэрэ.
Санатар буоллахха, «Күн оҕолоро» айар бөлөх бу киинэни 2020 сылга Бэрэсидьиэн пуондатын гранынан оҥорбута. 2021 сылтан саҕалаан киинэ араас бэстибээллэргэ кыттан, бириистээх миэстэлэргэ тиксибитэ. Ол курдук, былырыын Байкаллааҕы региональнай бэстибээл гран-притын ылбыта.
Балаҕан ыйын 2 күнүгэр «Перерыв на кино» бэстибээл кыайыылаахтарын Санкт-Петербург «Ленфильм» киинэ устуудьуйатыгар биллэриэхтэрэ.
Сонун төрдө: ЯСИА