Томпо улууһугар «Яна» айан суолугар болдьоҕун иннинэ Томпорук үрэҕи туоруур күргэ саҥаттан тутуллан аһылынна. Тутууну «Куттала суох хаачыстыбалаах суоллар» национальнай бырайыак иитинэн «Полиметалл» хампаанньаны кытта ыыттылар. Бу тэрилтэ эһиил өссө Ольчан, Уулаах уонна Кураанах үрэхтэри туоруур икки суолталаах күргэни үлэҕэ киллэриэҕэ.
Томпо улууһа уустук суоллаах улуустартан биирдэстэрэ буолар. Саҥа күргэ улуус сайдыытыгар эрэ буолбакка, Арктика атын оройуоннарын сайдыытыгар эмиэ төһүү буолуо. Күргэ уһуна - 40 миэтэрэ, киириитэ, тахсыыта 1 км уһуннаах. Куттала суох айаны хааччыйар 684 м күрүөлээх, 54 сигнальнай столбиктаах, 7 суол бэлиэлээх. Тимир күргэ сталефибробетон диэн матырыйаалынан бүрүллүбүт.
Саха сиригэр бу сыл бүтүөр диэри «Мухтуйа» айан суолугар Нүүйэ үрэҕи туоруур күргэни саҥардыахтара. 2018 сылтан барыта 49 күргэ үлэҕэ киирбит. Ону таһынан, сотору кэминэн Куйдуһун үрэҕи туоруур күргэни тутуу-таҥыы саҕаланыа.
Сонун төрдө: СӨ Бырабыыталыстыбатын уонна Ил Дарханын пресс-сулууспата