Саха сиригэр 2016 с. саҕалаан “Уһук Илин гектар” бырагырааматынан 13 153 сир учаастага дьоҥҥо бэриллибит. Ол иһигэр 1 715 учаастак бас билиигэ суруллубут, онтон арыандаҕа – 223.
Саха сиригэр Уһук Илин гектарын олорор дьиэ туттаары, балыктаары уонна бултаары, тус подсобнай хаһаайыстыба тэринээри, сүөһү иитээри уонна оттоору, туристары көрсөөрү ылаллар.
Санатар буоллахха, Уһук Илин гектарын ылыан баҕалаахтар “На Дальний Восток” федеральнай информация систиэмэтигэр сайабылыанньа ыыталлар. Сир учаастага гражданин туттуутугар биэс сылга босхо бэриллэр.
Бу бырагырааманан сир ылбыт буоллахха, дуогабар баттаһан баран икки сылы аһарбакка эрэ боломуочуйалаах уорганнарга сири туһаныы ханнык көрүҥүн талбыккын биллэриэхтээххин.
Онтон сири босхо туһаныы дуогабара баттаммыта түөрт аҥаар сылын аһардаҕына сири бас билиигэ эбэтэр арыандаҕа ылыыга сайабылыанньа ыытыллыахтаах. Даҕатан эттэххэ, ойуур пуондатыгар киирсэр сир учаастактара арыандаҕа эрэ бэриллэллэр.
Уһук Илин гектарын бырайыагынан олохтоохтор 1 гектардаах сири босхо туһаныыга ылыахтарын сөп. Маны тэҥэ биир гектары биир киһиэхэ биэриинэн суоттаан кэлэктиибинэй сайаапкалары эмиэ ылаллар.
Бэйэ кэр.