Ил Дархан Айсен Николаев “Бүлүү” Упрдор начаалынньыга Николай Андреевы кытта көрсөн суол оҥоһуутун кэпсэттилэр. 2023 сылга “Бүлүү” айан суолун өрөмүөнүн кэннэ 35,35 км үс саҥа суол учаастага үлэҕэ киириэхтээх. Ону таһынан 11,239 км-дээх икки учаастак хапытаалынай өрөмүөннэниэхтээх.
Ону тэҥэ, уопсайа, 678,88 п. м ускуустубаннай тутуу киириэхтээх. Ол курдук “Бүлүү” айан суолугар 8 учаастакка хапытаалынай өрөмүөн салҕанар уонна “Халыма” Р-504 тыраасса 662–692 км (“Заячья петля”), 1121–1142 км (“Нерский прижим”) уларытан оҥоруу ыытыллар.
Айсен Николаев бэлиэтээбитинэн, “Куттала суох, хаачыстыбалаах суоллар” нац-бырайыак чэрчитинэн ыытыллар үлэлэр үбүлээһиннэрэ кыччаабатын туһугар өрөспүүбүлүкэ былааннаахтык үлэлиир. Бүгүҥҥү күҥҥэ “Бүлүү” трассатын 660-с км Бүлүү өрүһү туоруур күргэ бырайыактыыр үлэтэ оҥоһуллубут, бырайыак быһыытынан күргэ 1,6 км уһуннаах, онтон киниэхэ киирии 20 км-дээх буолуохтаах. Маны таһынан, “Халыма” Р-504 айан суолун Дьокуускай–Магадаан учаастагын 350–374 км Алдан өрүһү туоруур күргэлээх уларытан оҥоруу бырайыагын докумуонун бэлэмнии сылдьаллар.
Көрсүһүү түмүгэр айан суолугар үлэлэри, былааннаммыттан көһөрөн, түргэтэтэргэ быһаардылар. Онно “Бүлүү” Упрдор туһааннаах докумуоннары бэлэмнээн, Ил Дархаҥҥа тиксэриэ.
2030 с. диэри “Бүлүү” уонна “Халыма” суолларын 80 %-нын нуормаҕа эппиэттиир гынар сорук турар.
“Бүлүү” Упрдор биэс сыл иһигэр өрөспүүбүлүкэҕэ 300 км хапытаалынай бүрүөһүннээх федеральнай айан суолун үлэҕэ киллэрдэ.
СӨ Ил Дарханын уонна Бырабыыталыстыбатын пресс-сулууспата
Андрей Сорокин, ЯСИА хаартыската