От ыйын 2 күнүгэр Ньурба улууһун Акана нэһилиэгэ төрүттэммитэ 195 сылын чэрчитинэн, Ньурбатааҕы кииннэммит бибилэтиэкэ ситимин Аканатааҕы филиалыгар нэһилиэк биир ытык киһитин, сэбиэскэй-партийнай үлэһит, өр сылларга нэһилиэги салайбыт, Ньурба улууһун Акана нэһилиэгин бочуоттаах олохтооҕо, Үлэ Кыһыл Знамята уордьан кавалера, кыраайы үөрэтээччи Василий Николаевич Николаев – Куххата Баһылай сырдык аатын иҥэрии үөрүүлээх сиэрэ-туома буолла.
Тэрээһиҥҥэ Акана нэһилиэгин Аҕа баһылыга Е.М. Семенов, Ньурба улууһун баһылыгын солбуйааччы Н.С. Петрова, кииннэммит бибилэтиэкэ ситимин диэриэктэрин солбуйааччы Е.М. Саввинова, ХИФУ профессора, п.н.д. Е.М. Поликарпова, тыа хаһаайыстыбатын бэтэрээнэ, Василий Николаевич үөлээннээҕэ, кырдьаҕас суруналыыс И.И. Николаев олоҕун устата үлэни өрө туппут ытык киһи туһунан истиҥник ахтан туран, аат иҥэриитинэн эҕэрдэлээтилэр. Дьокуускайтан чугас аймаҕа Дария Афанасьевна Иванова элбэх кинигэ кэһиилээх кэлэн, бибилэтиэкэҕэ туттарда.
Кэлбит ыалдьыттар “Үтүө киһи аата үйэлэргэ” кинигэ быыстапкатын, В.Н. Николаев дойдутун устуоруйатын илиинэн сурукка тиспит элбэх рукопиһын, араас сыллардааҕы хаартыскалары сэҥээрэ көрдүлэр. Тэрээһини Акана ымыылаах ырыаһыта Анна Торохова, эдэр ырыаһыт Милена сэргэх ырыаларынан киэргэттилэр.
Василий Николаевич уола, муниципальнай сулууспа бэтэрээнэ, Акана нэһилиэгэр баһылыгынан үлэлээн, төрөөбүт нэһилиэгин сайдыытыгар кылаатын киллэрсибит Николай Васильевич аҕатын туһунан сылаастык ахтан туран, кини аата бибилэтиэкэҕэ иҥэриллибитинэн аймахтар ааттарыттан истиҥник махтанна.
“Аҕабыт Василий Николаевич олоҕун устата элбэҕи аахпыт, кинигэ, хаһыат доҕордоох киһи этэ. Селькор быһыытынан дойдутун дьонун үлэтин-хамнаһын, ситиһиилэрин улуус, өрөспүүбүлүкэ хаһыаттарыгар мэлдьи сырдатара. Кинини оччотооҕу ааҕааччылар биир сытыы бөрүөлээх селькор быһыытынан өйдүүр буолуохтаахтар. Билигин сыыппара үйэтигэр бибилэтиэкэ бэйэтин аналын сүтэрбэккэ, норуот нэһилиэстибэтин харайар кэскиллээх үлэтэ саҥалыы сайдан иһиэхтин, билиигэ баҕалаах ыччат дьоммут элбии турдуннар. Бибилэтиэкэ дьиэтэ хаһан да иччитэхсийбэтин, саҥа интэриэһинэй бырайыактар айылла турдуннар”, – диэн Николай Васильевич баҕа санаатын тириэрдэн туран, олохтоох бибилэтиэкэҕэ элбэх функциялаах принтер бэлэхтээтэ.
Түмүккэ Ньурба улууһун уонна Акана нэһилиэгин бочуоттаах олохтооҕо Василий Николаевич Николаев сырдык аата иҥэриллибитин туоһулуур суругу-бичиги Акана нэһилиэгин баһылыга Ефрем Михайлович, бибилэтиэкэ үлэһитэ Евдокия Саввинова уонна Николай Николаев үөрүүлээхтик астылар. Бу күнтэн ыла Акана нэһилиэгин бибилэтиэкэтэ Василий Николаевич Николаев сырдык аатын сүгэр буолла.
Итини таһынан, бу үөрүүлээх күн Акана нэһилиэгин устуоруйатын суруйууга, сэрии, тыыл бэтэрээннэрин аатын үйэтитиигэ сүҥкэн кылааттаах, Ньурба улууһун бочуоттаах олохтооҕо, билигин Акана дьонун-сэргэтин төрдүн-ууһун чинчийиинэн утумнаахтык дьарыктана сылдьар кыраайы үөрэтээччи Владимир Михайлович Николаев “Дьонноох киһи тутайбат” диэн төрүччү кинигэтин сүрэхтэниитэ куйаар ситиминэн ыытыллынна.
Владимир Михайлович нэһилиэгин дьонун-сэргэтин төрдүн-ууһун чинчийбитэ уонтан тахса сыл буолла. Бу олус эппиэттээх, билим таһымнаах үлэ буоларын кэлэр көлүөнэ ыччат сыаналыа турдаҕа.
Мария НИКОЛАЕВА, библиотекарь.