“Алгыстаах айан аартыга” диэн сүрэхтэммит кыбытык тигии панно Өймөкөөҥҥө Олоҥхо ыһыаҕын ыалдьыттарын сөхтөрдө.
Ол курдук, Өймөкөөҥҥө буолбут Олоҥхо ыһыаҕар уран тарбахтаахтар быыстапкаларыгар Екатерина Михайловна Бочкарева салайааччылаах Уус Алдан улууһун “Мүрү оһуора” холбоһук кыттыылаахтара кыбытык тигии ньыматынан удьуор сылгыһыт Дугуйдаан Винокуров айаныгар анаммыт “Алгыстаах айан аартыга” паннону оҥорон, дьон-сэргэ дьүүлүгэр таһаардылар. Паннону көрбүт хас биирдии ыалдьыт уран оҥоһугу үрдүктүк сыаналаата, сөхтө-махтайда. “Олус да кэрэ!”, “Тыый, Уус Алдан маастардара!” диэн ыалдьыт эрэ биһирээтэ, хайҕаата.
Быыстапканы Ил Дархан Айсен Николаев эмиэ көрдө. Оттон Дугуйдаан бэйэтэ кинини дьүһүйбүттэрин көрөн, соһуйда, соһуччу үөрдэ, махтанна. Тоҕо диэтэххэ, ити күҥҥэ диэри иистэнньэҥнэр паннону чып кистэлэҥҥэ тута сылдьыбыттара.
Даҕатан эттэххэ, панноҕа дьүһүйүллүбүт хаартысканы 2021 сыл кулун тутар 1 күнүгэр Дугуйдаан Винокуровы айаҥҥа атаарар дьоро тэрээһиҥҥэ Уус Алдан улууһун дьаһалтатын пресс-сулууспатын салайааччыта Люция Бурцева түһэрбитэ, тэрээһиҥҥэ улуус баһылыга Алексей Федотов кыттыбыта. Кинилэр айанньыкка ат толору симэҕин кытта дьоҕус бэлэҕи бэлэхтээбиттэрэ.
Санаттахха, Уус Алдан улууһун гиэрбэтэ – атыыр сылгы. Онон, саха сылгытын аар саарга аатырдыбыт Дугуйдаан Винокуровы кытта уус алданнар ситиминэрин быспаттар. Мэлдьи хардары билсэллэр.
Бу туһунан Уус Алдан пресс-сулууспата иһитиннэрэр.