Бары күүһү – ойуур баһаарыгар. Саха сиригэр халлаан хаһааҥҥытааҕар да куйааран турар. Термометр шкалата +30 кыраадыс итииттэн түспэт. Өрөспүүбүлүкэ бары кэриэтэ улууһугар кураанах этиҥ этэр. Оттон ол түмүгэр, ойуур баһаара турар куттала үөскүүр. Ил Дархан Айсен Николаев “Якутия вперед!” биэриигэ кэпсээбитинэн, уот турар муҥутуур кутталлаах кэмин мүччү түһэргэ бары күүһү бэлэмнээн олороллор.
“Уот турар муҥутуур куттааллаах кэмигэр үктэннибит. Кэлэр икки-үс нэдиэлэ дьыл түмүгүн барытын быһаарыаҕа. Уоту бохсор күүс барыта бэлэм турар, үлэ-хамнас тохтообот. Билигин, бастатан туран, баһаар буоллаҕына быыһыыр сулууспалар суһаллык миэстэтигэр тиийэ охсоллорун туһугар, кинилэри тиэйиэхтээх, үлэҕэ-хамнаска туттуллуохтаах тиэхиньикэни көһөрөн эрэбит”, – диир Айсен Николаев.
Бэс ыйын 29 күнүнээҕи туругунан, Саха сиригэр барыта 21 сиргэ тыа-ойуур умайа турар. Онтон 10 уотун умуллара сылдьаллар. 11 баһаар уустук суоллаах-иистээх, киһи тиийбэт сиригэр баарынан, кэтээн көрөллөр, ыраахтан хонтуруоллууллар. “Балаһыанньаттан көрөн, кыаллар буоллаҕына, “хонтуруолланар зонаҕа” киирэр буолун-суох буоллун, барытын умуллара сатыыбыт”, – диир Ил Дархан.
Айсен Николаев эппитинэн, быйыл баһаары бохсорго бэлэмнэнэр үлэ үрдүк таһымнаахтык ааспыт. Ол түмүгэр, күн бүгүн урукку сыл баччатынааҕар тыа аҕыйахтык умайбыт.