Саха эстрадатын саамай чаҕылхай сулуһа Далаана Саҥа дьыл бырааһынньыгын кэнниттэн сынньана, күүлэйдии таарыйа дьикти айылҕалаах, эйэҕэс дьонноох итии дойдуга барыан баҕарарын кэпсээбит. Дьүөгэлэрин Олимпияны уонна Никаны кытары Гоаҕа эбэтэр Таиландка сынньана барар былааннаахтарын үллэстибит.

Отой соторутааҕыта Бэрэсидьиэн анал Ыйааҕынан муниципальнай тэрээһиннэргэ бэрэсидьиэн бэрэстэбиитэллэрин института диэн баар буолта. Моно-куораты сайыннарыы боппуруоһугар олохтоох бэйэни салайыы уонна СӨ Судаарыстыбаннай былааһын ситэриилээх уорганнара бииргэ үлэлииллэрин хааччыйарга суоттанан, Булуҥ улууһугар бэрэстэбиитэлинэн Анатолий Степанович Антонов анаммыта.

Хаандыгаҕа киэһэ кафега сынньана олоро дьоннор икки ардыларыгар этиһии тахсыбыт. Буоларын курдук, этиһии үргүччү охсуһууга кубулуйбут. Хотторон эрэр кэлии дьон, соҕуруу хайа уолаттара бэйэлэрин дьоннорун ыҥыран ылан, биһиги дьоммутун улаханнык эчэппиттэр. Омук омукка киирсибит, хаан-хааҥҥа буолбут. Олохтоох дьон ыарахан туруктаах балыыһаҕа киирбит. Оттон кыайбыт кэлии дьон үгүс өттө күрээбит диэн кэпсииллэр. Кыргыс үйэтин сөргүтэн төһө кэскилбит кэҥиирий, ыырбыт ыраатарый?

Бэҕэһээ, олунньу 13 күнүгэр, Италия премьер-миниистирин Сильвио Берлускони утарар, кинини отставкаҕа таһаарарга акция буолан ааста. Бу акцияны дьахталлар 250 куоракка тэрийэн ыыппыттар. 75 саастаах эрээри, бэрт тэтиэнэх Сильвио Берлускони аан дойдуга сексуальнай, сааттаах айдааннарынан аатырар. Тэлэбиисэргэ соторутааҕыта «Мин хоонньоһорбун дьахталлар сөбүлүүллэр» диэн этиитэ, бука, бүтэһик туочука буолбут быһыылаах. Дьахталлар улаханнык уордайбыттар.

Сарсын, олунньу 10 күнүгэр, Санкт-Петербург куораты хаартан ыраастыыр акция ыытыллар. Маннык акцияны XZ диэн ааттаах дьахталлар түмсүүлэрэ ыытар. Кылгас дьууппа, үрдүк хобулуктаах түүппүлэ кэппит  кырасыабай кыргыттар таһырдьа тахсан хаары ыраастыахтара. Кинилэр төбөлөрүгэр муус чопчутуттан харыстанар кааскалаах буолуохтара. Кыргыттар сыаллара-соруктара, биллэн турар, хаары ыраастыыр буолбатах.

Бэҕэһээ, ахсынньы 14 күнүгэр, Голливуд кырасаабыссата, 26 саастаах  актриса Скарлетт Йоханссон уонна кини кэргэнэ, 34 саастаах Голливуд актера  Райан Рейнолдс арахсан эрэллэрин биллэрдилэр. Райан быйыл «People» сурунаал сыанабылынан саамай имэҥнээх дьүһүннээх, сексуальнай артыыһынан биллибитэ. Кинилэр баара-суоҕа икки сыл олордулар. Ол гынан баран арахсар эрэр артыыстар бэйэ-бэйэлэригэр үчүгэй, истиҥ сыһыаннаах арахсан эрэллэрин тоһоҕолоон эттилэр. Биһиги дьоммут курдук, өлөр өстөөх буолан арахсыбатахтар.

Москуба мээрэ Сергей Собянин кырдьаҕас пенсионердарга анал кыра куораттары тутуохха баар этэ диэн этии киллэрдэ. Дьэ оччоҕо пенсионердар үчүгэйдик олоруо этилэр, туруктара, доруобуйалара тупсуо этэ диэн сабаҕалыыр. Кини санаатынан, Москуба куорат олохтоохторо наһаа элбэхтэр, онон сорохторо көһөн-көҕүрээн иҥин биэрэллэрэ эбиттэрэ буоллар, дьэ бэрт буолуо этэ. Кини хараҕар Москубаҕа олорор чиэскэ кырдьаҕас дьон  сөбө суохтара ордук быраҕыллыбыт.

Элбэх киһи уйулҕатын хамсатар ырыалаах, эр дьоннор харахтарын сымнатар быһыылаах-таһаалаах, «Кофе» дуэт кырасыабай кыргыттара арахсан эрэллэр диэн кэпсииллэр. Кэнники бириэмэҕэ бэйэ-бэйэлэриттэн сылайан, иирсэллэрэ элбээбит. Кэнсиэрдии киирээри туран, оннооҕор тус-туһунан гримеркаларга кырааскаланар буолбуттар. Арахсыахтарын иннинэ, бүтэһик төгүл бииргэ өлгөм харчыны хамсатар сыалтан, сүүстэн тахса Саҥа дьыллааҕы корпоративкаларга ыллыыр былааннаахтар.

Египеккэ бараары сылдьар туристар истиилэригэр бэрт кутталлаах иһитиннэриилээхпит. Онно Арассыыйаттан сылдьар туристары бултаһар акула үөдүйбүт. Хас да киһи илиитин, атаҕын быһыта ытырталаабыт. Акула туристар Арассыыйаттан сылдьалларын хайдах билэттиир баҕайытай? Сыгынньах сөтүөлүү сылдьар киһи оттон барыта биир ини.

Бүгүн, сэтинньи 30 күнүгэр, Өймөкөөҥҥө халлааннара аһара тымныы буолан оскуола оҕолорун үөрэхтэрэ тохтообут.