Сыана сыллата үрдүү турарыгар Арассыыйа олохтоохторо үөрэммиппит быданнаата. Ол эрээри, бу сырыыга «Минньигэc» олоххут түмүктэнэн эрэр» диэн иһитиннэрии минньигэһи сөбүлээн астыыр уонна сиир дьоҥҥо ыраас халлааҥҥа этиҥ эппитинии иһилиннэ.
Арассыыйа бөдөҥ кондитерскай тэрилтэлэрэ олунньу 1 күнүттэн сыаналарын үрдэтэллэрин туһунан биллэрбиттэр. Ол курдук, торт уонна пирожнай 23 % - нан, баахыла уонна кэмпиэт 18-19% - нан, сакалаат – 9% - нан, ыас – 5-6% - нан үрдүө диэн сабаҕалыыллар.
«Кондитерскай оҥоһук сыанатын үрдээһинэ сүрүн эбиилик - саахар сыанатыттан быһаччы тутулуктаах», – диэн быһаарар Кондитерскай бырамыысыланнас тэрилтэлэрин холбоһугун («АСКОНД») дириэктэрин эбээһинэһин толорооччу Вячеслав ЛАШМАНКИН. Кини этэринэн, саахар сыаната кэнники икки сыл устатыгар 113% - нан үрдээбит эбит. Онно кондитерскай оҥоһукка туттуллар какаолаах бородуукта, бурдук, арыы араас көрүҥүн уонна онтон да атын эбиликтэр сыаналарын, оҥоһук суутун, хаатын, айанын ороскуотун эбэн кэбистэххэ, кыра-хара киһи хармааныгар улаханнык охсор сыана тахсан кэлэр.
Дьиҥэр, Арассыыйа кондитерскай оҥоһуктары тас дойдуттан атыыласпат буолбута ырааппыт эбит. Итиннэ импорт кээмэйэ 10% - ҥа да тиийбэт. Соһуйуох иһин, бары бэркэ диэн билэр «Марс», «Киндер Сюрприз», «Рафаэлло» мааркалаах кэмпиэттэрбит маннааҕы собуоттарга оҥоһуллар эбиттэр. Эспиэрдэр аахпыттарынан, Арассыыйа үрдүнэн 150 бөдөҥ кондитерскай тэрилтэ баар. Онон кинилэр икки ардыларыгар күрэстэһии баар буолан, сыана наһаа бэйдиэ барбатах. Салгыы да оннук буолуо диэн эрэниэххэ...
Сахабыт сиригэр кондитерскай тэрилтэлэр наһаа элбэҕэ суохтар, арай киин куораппытыгар кэнники сылларга дьобуруоппалыы моһуоннаах оҥорон таһаарааччылар баар буолбуттара көстөр. Оттон дьиэҕэ туорт эгэлгэтин астаан атыылыыр кэрэ аҥаар ахсаанын киһи ааҕан сиппэт буолла. Бу дьарыгы саха кыргыттара олус түргэнник уонна айымньылаахтык баһылаатылар. Инстаграм көрдөбүлүгэр «торт» диэн тылы киллэрдэххэ, киһи хараҕа иириэн курдук элбэх дьон тахсан кэлэр. Онон, туордунан эргинии элбэх дьахтар аймаҕы, үгүс саха ыалын эбии харчылыыр. Оттон кинилэртэн дьиэтээҕи ураты туорду сакаастаан ылааччылар үөрүүлэрэ муҥура суох буолар (ол түмүгэр инстаграм сирэйэ баранар).
«Дьиэҕэ астаммыт туорду амсайбыт дьон маҕаһыын киэнин кыайан сиэбэт буолаллар, ол да иһин туорт астааччылар сакаастара хаһан баҕарар элбэх», – диир хайыы үйэ 7 сыл ыстаастаах дьиэтээҕи кондитер Анна КОРНИЛОВА.
Кини этэринэн, туорт астыырга туттуллар бородуукта сыаната былырыын сайыҥҥыттан саҕалаан күүскэ үрдээбит. Саамай сыаналаахтара туорт кириэмин оҥорорго туттуллар чөчөгөй (сливки), иэдьэгэйдээх сыыр (творожный сыр) эбиттэр. Ол да буоллар Анна, сыана үрдээбититтэн сылтаан, дьиэтээҕи туорду астатан ылааччылар улаханнык аҕыйыахтара суоҕа диир, тоҕо диэтэххэ, дьиэҕэ астаммыт туорт хаһан баҕарар сибиэһэй, минньигэс уонна киһи доруобуйатыгар, чуолаан оҕолорго, туһалаах буолар диэн кини бигэ эрэллээх.
Оттон күн бүгүн кондитерскай маҕаһыыннарга атыылыы турар үлэһиттэр саҥа дьыл кэннэ сыаналара ортотунан 5 солкуобай үрдээбитин уонна атыылаһааччы ахсаана лаппа аҕыйаабытын бэлиэтииллэр. Биллэн турар, ол кинилэр хамнастарыгар быһаччы охсор. Онон олунньу 1 күнүттэн кондитерскай оҥоһуктарга сыана үрдүүрүн туһунан сонуну кинилэр соһуйа уонна сонньуйа иһиттилэр.
Түмүктээн эттэххэ, биир өттүнэн минньигэстэн киһи уойар уонна ыалдьар диэн санаа баар. Оттон минньигэс киһиэхэ төһөлөөх үөрүүнү, астыныыны-дуоһуйууну аҕаларын санаатахха, «баар буоллун өрүү минньигэс!» диэҕи баҕарыллар.Онон ыран баран хомойо сылдьыах кэриэтэ, уойан баран үөрэ сылдьыбыт ордук курдук. Оннук буолбат дуо?
