Биһиги элбэх оҕолоох дьиэ кэргэн аҕа баһылыга, киэҥ аймахха сүдү киһибит, аҕабыт, эһэбит, хос эһэбит, тыыл, үлэ ИДьМ бэтэрээнэ, Ис сулууспа астаапкаҕа тахсыбыт мойуора «РСФСР Баһаарынай сулууспатын бастыҥ үлэһитэ», «СӨ Бэрээдэги уонна сокуоннаһы бөҕөргөтүүгэ кылаатын иһин», «Горнай улууһун сайдыытыгар кылаатын иһин» бэлиэлэр хаһаайыннара, Бэрдьигэстээх нэһилиэгин уонна Горнай улууһун бочуоттаах олохтооҕо Шамаев Егор Егорович
тохсунньу 6 күнүгэр ыарахан ыарыыттан күн сириттэн күрэннэ. Олунньу 14 күнүгэр 40 хонугун туолар. Аҕабыт Егор Егорович 1930 сыллаахха ахсынньы 25 күнүгэр Бүлүү улууһун Дьөккөн нэһилиэгэр Шамаев Егор Филиппович уонна Шамаева (Павлова) Прасковья Иннокентьевна дьиэ кэргэннэригэр бастакы оҕонон күн сирин көрбүтэ. Сэрии ыар сылларыгар төгүрүк тулаайах хаалан, Хампа, Дьокуускай 2 №-дээх оскуолаларыгар үөрэнэр. 9 кылаас кэнниттэн 3 сыл Сэбиэскэй аармыйа кэккэтигэр Калининград уобалаһын Знаменскай куоратыгар сулууспалыыр. Онтон эдьиийигэр Евдокия Иннокентьевна Шамаеваҕа олорон Бэрдьигэстээх орто оскуолатын 1954 сыллаахха бүтэрэр. Оскуола кэнниттэн Мытаах нэһилиэгэр ааҕар балаҕан сэбиэдэссэйинэн үлэтин саҕалыыр. Бэрдьигэстээхтээҕи суол учаастагар маастарынан үлэлии сырыттаҕына райкомҥа ыҥыран баһаарынай иниспиэктэргэ үөрэнэ барарыгар сүбэлииллэр. Омскай куоракка үөрэнэн, оройуоҥҥа бастакы баһаарынай иниспиэктэринэн эҥкилэ суох 25 сыл устата үлэлээбитэ. Үлэтигэр олус кичэллээҕэ. Биир бастыҥ үлэ-олох үөрүйэхтэригэр күүстээх ирдэбиллээх, аһара эппиэтинэстээх, бэриниилээх этэ. Үлэлиирин тухары солбуллубат дьокутаат, ханнык баҕарар боппуруоһу сыныйан бэлэмнээн, сиэссийэлэргэ киллэрэринэн кимиэхэ да тэҥэ суоҕа. Онон эрэ муҥурдаммакка уопсастыбаннай үлэҕэ көхтөөхтүк кыттара. Улууска ыытыллар парааттары иилээн-саҕалаан ыытара. Бэрдьигэстээхтээҕи норуодунай тыйаатырга артыыстыыра. Тапталлаах аҕабыт, ийэбит Елизавета Петровналыын 56 сыл устатыгар бэйэ-бэйэлэрин ытыктаһан, таптаһан, 6 оҕолонон, улаатыннартаан, барыбытын идэлээх үлэһит, ыал гынан, элбэх сиэн тапталлаах эһэтэ буолан, удьуору утумнуур, олоҕу салгыыр кэскиллэрин хаалларан барда. Мэлдьи элбэх ыалдьыттаах, хоноһолоох, кэлбити үөрэ көрсөр, үтүө үгэстээх ыалга элбэх аймах оҕолоро олорон үөрэммиттэрэ, үтүө сүбэлэрин-көмөлөрүн ылан олоххо сөптөөх суол булуммуттара. Аҕабыт бу Орто дойдуга дьоһуннаахтык, чугас дьонугар, аймахтарыгар холобур буолар курдук олорон ааспытынан киэн туттабыт, ыарахан кэммитигэр кыһалҕабытын, кутурҕаммытын тэҥҥэ үллэстибит, күүс-көмө өйөбүл буолбут аймахтарбытыгар, доҕотторбутугар, табаарыстарыгар махталбытын тиэрдэбит. Тапталлаах аҕабыт, эһээчикэбит барахсан сырдык мөссүөнэ, үтүө-мааны майгыта биһиги өйбүтүгэр, сүрэхпитигэр мэлдьи тыыннаах, үтүө өйдөбүл буола сылдьыаҕа. Быдан дьылларга бырастыы, быраһаай... Эн биһиги өйбүтүгэр-санаабытыгар өрүү тыыннааххын.
