Балаҕан ыйын 1 күнүгэр Сунтаарга, Амма улууһун Бөтүҥэр уонна Дьокуускай куоракка үс саҥа оскуола арылынна.
Дьокуускайдааҕы 6-с №-дээх оскуола үөрэнээччилэрин икки бүк үөрүүлэринэн Ил Дархан Айсен Николаев эҕэрдэлээтэ. Саҥа оскуола бастакы сыбаайата 2017 сыллаахха турбут. Ол саҕана Айсен Николаев Дьокуускай куорат мэринэн үлэлии олорбут. “2015 сыллаахха Дьокуускайга 12 социальнай эбийиэги тутууга судаарыстыбаннай-чааһынай бииргэ үлэлээһин бырайыагын оҥорон көмүскээбиппит. Олортон ДСК оройуонугар баар 6-с №-дээх оскуола саҥа дьиэтин биир бастакынан киллэрбитим. Тоҕо диэтэххэ, уһуйаан дьиэтин аҥарыгар үлэлии олорбуттара. Уонна Автодорожнай уокурук Дьокуускай куорат биир саамай тэтимнээхтик сайдар оройуона буолар. Манна дьон ахсаана күннэтэ элбии турар”, – диэн Айсен Николаев кэпсээтэ.
Ил Дархан “ВИС” хампаанньа тутааччыларын үлэтин үрдүктүк сыаналаата. Кинилэр үс сыл иһигэр аныгы, тупсаҕай тутууну дьэндэттилэр. “Мантан инньэ 6-с №-дээх оскуола усулуобуйата ордук бэлэмнээх оҕолору үөрэтэн, иитэн таһаарыа диэммин эрэнэбин”, – диэн Ил Дархан баҕа санаатын эттэ.
Үс мэндиэмэннээх, 8000 тахса кв м иэннээх дьиэҕэ, үөрэнэр кылаастары таһынан лабораториялар, лингафоннай кэбиниэттэр уонна лекционнай аудиториялар, актовай, спортивнай, гимнастическай заллар бааллар. Ону таһынан, куухуналаах уонна киэҥ-куоҥ аһыыр сирдээх. Оскуолаҕа биир симиэнэҕэ 500 оҕо үөрэнэр кыахтаах.
Ил Дархан саҥа эбийиэги Дьокуускайга эрэ буолбакка, бүтүн өрөспүүбүлүкэ үрдүнэн биир бастыҥынан ааттаата. “Биһиги саҕалаабыт үлэбитин Сардана Владимировна тиһэҕэр тиэртэ диэммин оҕолор, төрөппүттэр уонна учууталлар тустарыгар олус үөрэбин”, – диэн Ил Дархан эттэ уонна оҕолорго ситиһиилээх үөрэҕи баҕарда. Уонна оскуола дириэктэригэр саха норуотун материальнай уонна духуобунай нэһилиэстибэтин дэҥҥэ көстөр энциклопедиятын уонна 100 кинигэҕэ анаммыт библиотеканы бэлэхтээтэ.
Оскуола дириэктэрэ Маргарита Куличкина саҥа оскуолаҕа ааспыт сылга тэҥнээтэххэ 170-нан элбэх оҕо үөрэниэ диэн эттэ. Уонна саҥа үс кылаас арыллыбытын кэпсээтэ. Билигин уопсайа 29 кылаас буолбут. “Кэлэр сылга икки кылааһы таһаарабыт уонна биэс кылааһы ылыахпыт. Биһиги оскуолабытыгар 786 оҕо үөрэнэрэ, билигин 915 оҕо буолла” , – диэн оскуола дириэктэрэ Маргарита Куличкина киэн тутта кэпсээтэ. Ону таһынан, эдэр учууталлар үлэлии кэлбиттэрин бэлиэтээтэ.
Хас да сыллар тухары сыл аайы 10 саҥа оскуола үлэҕэ киирэр. Ол да буоллар Ил Дархан кэпсииринэн, Дьокуускай куоракка өссө да оскуола тиийбэт. Билии күнүгэр Дьокуускайдааҕы 31-с №-дээх оскуола саҥа дьиэтин сыбаайата түһэрин иһитиннэрдэ. Ону таһынан, үс оскуола эбии эбийиэктэрин өрөмүөннээһин үлэтэ түмүктэнэр. Бу эбийиэктэр 2018 сыл бүтүүтэ Владимир Путин дьаһалынан ылыллыбыттар. Сыл түмүктэниэр диэри куорат дьаһалтата бу эбийиэктэри үлэҕэ киллэриэхтээх.
“Дьокуускай куорат оскуолаларынан бырагыраамма салҕанар. Куорат салалтатын кытта оскуола тиийбэт кыһалҕатын быһаарыахпыт диэн эрэнэбин”, – диэн Айсен Николаев эттэ.
Yakutia24/Якутия24
