(“Битии” үҥкүү бөлөҕө Универсиадаҕа кыттыаҕа)
Дьокуускайдааҕы педагогическай колледж иһинэн үлэлиир “Битии” үҥкүү бөлөҕө Красноярскай куоракка ыытыллар XXIX Аан дойдутааҕы кыһыҥҥы Универсиада култуурнай бырагырааматыгар кыттар чиэскэ тиксибитин туһунан саайпытыгар сырдатан турабыт.
СӨ култуураҕа туйгуна Владимир Александрович Собакин салайааччылаах дьоҕус кэлэктиип, этно-фольклорнай театрализованнай кэнсиэр бырайыагын оҥорон, 53 үлэттэн талыллан “Благославление земли Олоҥхо” диэн Сахабыт сирин билиһиннэрэр улахан кэнсиэри көрдөрүө.
Баара-суоҕа үс сыл үлэлээбит кэлэктиип маннык бөдөҥ тэрээһиҥҥэ кыттар буолбута педагогическай колледж дьоһун ситиһиитэ буолар. Красноярскай куоракка үс салайааччылаах 20 устудьуон барыаҕа. Биллэн турар, үп-харчы боппуруоһа сытыытык турара саарбаҕа суох. Ону өйдөөн, “Ситим” медиа бөлөх генеральнай дириэктэрэ, Ил Түмэн дьокутаата Мария Николаевна Христофорова көҕүлээһининэн, ахсынньы 14 күнүгэр Саха национальнай гимназия актовай саалатыгар, Дьокуускайдааҕы педагогическай колледж үөрэнээччилэрэ, выпускниктара уонна “Битии” үҥкүү бөлөҕө кыттыылаах көмө кэнсиэр буолан ааста.
Манна ыҥырыылаах ыалдьыттарынан СӨ Конституционнай суутун бэрэссэдээтэлэ Александр Николаевич Ким-Кимэн, урбаанньыт, Ил Түмэн дьокутаата Руслан Еремеевич Федотов, Ил Түмэн дьокутаата, бэлиитик, мэссэнээт Михаил Ильич Эверстов аатыттан көмөлөһөөччүтэ Сахаяна Дмитриена Николаева уонна Таатта улууһун баһылыгын аатыттан солбуйааччыта Мирон Иванович Эртюков кыттыыны ыллылар.
“Мин 1978 сыллаахха 1 №-дээх Дьокуускайдааҕы педагогическай училищаны бүтэрбитим. Элбэх үрдүк үөрэх кыһаларыгар, академияларга үөрэммитим эрээри, педагогическай училищаҕа ылбыт билиибин үрдүктүк сыаналыыбын. Ситиһиилэрим төрүөтүнэн ааҕабын. Ол иһин, үрдүк, орто үөрэх диэн араарбакка устудьуоннары барыларын өйүөх тустаахпыт”, – диэн Александр Ким-Кимэн эттэ уонна педагогическай колледж дириэктэрин эбээһинэһин толорооччу Надежда Павловна Мурукучаева “Битии” үҥкүү бөлөҕүн үрдүк ситиһиитинэн эҕэрдэлээн туран махтал сурук уонна 10 тыһ. солк көмө харчыны туттарда.
Ону таһынан, колледж устудьуоннарын Алиса Егорованы, Алина Кириллинаны уонна бөлөх салайааччытын Владимир Александрович Собакины дипломнарынан наҕараадалаата.
Ааспыт саас Амма улууһугар халаан уута кэлэн үгүс дьону аймаабыта. Манна биир бастакынан урбаанньыт, Ил Түмэн дьокутаата Руслан Еремеевич Федотов күүс-көмө буолбута. Кини колледж устудьуоннарын, үлэһиттэрин үрдүк ситиһиилэринэн эҕэрдэлээн туран биир дойдулааҕар, колледж устудьуонугар, “Битии” бөлөх үҥкүүһүтүгэр Сандаара Бочкареваҕа 25 тыһ. солк. сэртипэкээти туттарда.
Таатта улууһун баһылыга Михаил Михайлович Соров аатыттан, кини солбуйааччыта Мирон Иванович Эртюков бэйэтин эҕэрдэ тылын эттэ. Бэлиитик, мэссэнээт Михаил Ильич Эверстов көмөлөһөөччүтэ Сахая Дмитриена Николаева, Кэбээйи улууһуттан төрүттээх колледж үһүс кууруһун устудьуонугар, “Битии” бөлөх үҥкүүһүтүгэр Петр Кобяковка 25 тыһ. солк сэртипикээти туттарда.
Мария Николавена Хаҥалас улууһун аатыттан 44 тыһ. солк сэртипикээти уонна “Ситим” медиа -бөлөх, “Кыым” норуот хаһыатын аатыттан педагогическай колледж кэллэктиибин, устудьуоннарын эҕэрдэлээтэ уонна 47 тыһ. солк сэртипикээти туттарда.
Дьокуускайдааҕы педагогическай колледж дириэктэрин эбээһинэһин толорооччу Надежда Павловна мустубут дьоҥҥо махталын эттэ уонна күүс-көмө буолбут Ил Түмэн дьокутааттарыгар Александр Николаевичка, Руслан Еремеевичка, Михаил Ильичка, Таатта улууһун баһылыгар Михаил Михайловичка, Екатерина Яковлевнаҕа, Валентина Семеновнаҕа уонна бу кэнсиэри көҕүлээбит, “Ситим” медиа -бөлөх дириэктэригэр Мария Николаевнаҕа махтал суруктары туттарда.
Кэнсиэри “Туймаада” ырыа ансаамбылын солистара, колледж выпускниктара Светлана Лаврова, Николай Роббек ылбаҕай ырыаларынан киэргэттилэр.
“Битии” үҥкүү бөлөҕүн ситиһиитэ:
- XIII бүтүн Аан дойдутааҕы үҥкүү Олимпиадатыгар 7 миэстэни ылары ситиспитэ (2016 с, Москуба).
- “Новое поколение” бэстибээл лауреата (2016 с, Москуба).
- “Үҥкүү этэр, эдэр саас” норуот үҥкүүтүн өрөспүүбүлүкэтээҕи күрэһин лауреата (2016 с, Чурапчы).
- “Свое Решение” III бүтүн Арассыыйатааҕы теаральнай күрэс лауреата (2016 с, Владивосток).
- “Студенческая весна” лауреата (2017 с, Дьокуускай).
- “Ай-тыын” үҥкүү бэстибээлигэр “Бастыҥ балетмейстер үлэтэ” номинация хаһаайына (2017 с, Мэҥэ-Хаҥалас).
- “Созвездие танца” күрэс лауреата (2017 с, Москуба).
- “Снежные узоры” үҥкүү уонна муода норуоттар икки ардыларынааҕы күрэс “Гран-при” хаһаайына (2018 с, Мэҥэ-Хаҥалас).
- Станислав Катаков аатынан үҥкүү кэллэктииптэрин ортотугар ыытыллыбыт “Танцует Якутия” национальнай күрэс-бэстибээл “Гран-при” хаһаайына (2018 с, Дьокуускай).
- “Туймаада ыһыаҕын”, куорат күннэрин кыттыылааҕа.
Владимир Григорьев түһэриилэрэ