Ахсынньы 13 күнүгэр, Мииринэй куоратын «Алмаас» култуура дыбарыаhыгар үлэни көрдөөччүлэргэ улахан дьаарбаҥа буолан ааста.
Манна, эрдэттэн күүтүллүбүтүн курдук, элбэх киһи тоҕуоруста.
Үлэ дьаарбаҥкатыгар Удачнай, Айхал, Ньурба хайаны байытар кэмбинээттэрэ, «Алмаздортранс», «ТаасҮрэхнефтегаздобыча», «Колмар», «НГДУ Илин Сибиир» (“Иирэлээхнефть”), «РНГ» («Роснефть») курдук, биллэр-көстөр, бөдөҥ бырамыысалыннас тэрилтэлэрэ кыттыыны ыллылар.
Yлэни көрдөөччүлэргэ бакаансыйалары биэрэр тэрилтэлэр бэрэстэбиитэллэрэ анкета уонна резюме толортортоотулар.
Хас эмэ ыйы-ыйынан, сылы-сылынан, түптээх үлэ булбакка эрэйи көрө сылдьыбыт дьоҥҥо бу тэрээһин эрэл кыымын сахта. Санатар буоллахха, быйыл өрөспүүбүлүкэҕэ Дьарыктаах буолуу сыла түмүктэнэр.
Бу дьаарбаҥка Саха сирин арҕааҥҥы бырамыысалыннастаах оройуонугар үлэ боппуруоһун быһаарарга улахан суолталаах буолла.
Станислав Алексеев, Мииринэй куорат. Ааптар хаартыскалара.