Балаҕан ыйын 9 күнүгэр Ил Дарханы, Ил Түмэҥҥэ дьокутааттары таһынан, муниципальнай быыбардар ыытыллыахтара. Дьокуускай куорат баһылыгын дуоһунаһыгар киирсэр баҕалаах бастакы хандьыдаат билиннэ.
Ол курдук, мээргэ 48 саастаах урбаанньыт Афанасий Алексеев анньыһыаҕа. Кини “Родина” бэлиитикэ баартыйатыттан туруммут. Баартыйа кэмпириэнсийэтигэр Афанасий Алексеевы өйөөбүттэр.
Афанасий Алексеев “Японец” массыына саппаас чааһын маҕаһыынын генеральнай дириэктэрэ, “ОПОРА России” урбаанньыттар Бүтүн Арассыыйатааҕы уопсастыбаларын Саха сиринээҕи салаатын хос бэрэссэдээтэлинэн үлэлиир. Кини норуокка Леваднайдар хара күүстэринэн тута сыппыт Филиппин гражданкатын быыһаан ылбытынан киэҥник биллибитэ.
