Муус устар бүтэһик күннэригэр Казахстан Нур-Султан куоратыгар Бэһис Евразия норуоттарын икки ардыларынааҕы Eurasian Book Fair-2022 диэн кинигэ быыстапка-дьаарбаҥката буолан ааста. Тэрээһин сыала-соруга – кинигэ ааҕыытын көҕүлээһин, өйөөһүн, литературнай баайы сайыннарыы буолар. Тэрээһини Казахстан өрөспүүбүлүкэтин "Фолиант" диэн кыһата иилээн-саҕалаан ыытта.
Eurasian Book Fair-2022 — киэҥ далааһыннаах, 5 күннээх култуурунай, дьыалабыай тэрээһин. Быыстапка чэрчитинэн, саҥа уус-уран, үөрэх, билис уонна оҕо кинигэлэрин киэҥ эйгэҕэ билиһиннэрии, кинигэ оҥоруутун туһунан кэпсэтиилэр, сайыннарар, айар кииннэртэн оҕолорго аналлаах маастар-кылаастар, поэзия киэһэлэрэ, суруйааччылар автограф-сиэссиэйэлэрэ уонна төгүрүк остуоллар буоллулар.
Бэйэлэрин көрдөрө уонна билиһиннэрэ 80-тан тахса издательскай, кинигэ атыылыыр, полиграфическай, үөрэх, билим тэрилтэлэрэ, холобур, "Мектеп", "Атамура", "Лантар", "МИФ, «Белый город», «Машины творения» «Просвящение», «Самокат», Mega Basym, China Renmin University Press полиграфиялара, Иран, Испания Посольстволара, Казахстантан үрдүк үөрэх кыһалара уонна "Айар" кинигэ кыһата ыалдьыттаатылар.
"Айар" кыһа маҥнайгытын Евразияҕа бэйэтин кинигэлэрин көрдөрдө. Казахтар бырааттыы тюрк тыллаах омук буолан, саха кинигэлэрин олус интэриэһиргээтилэр. "Саха поэзиятын антологията", Николай Лугинов "Чыҥыс Хаан ыйааҕынан" арамаана казахтыы тылбаастаммыттарын кэрэхсээннэр, үөрүүбүт, киэн туттуубут үксээтэ. Быыстапка кэмигэр оскуола оҕолорун оптуобуһунан быыстала суох таһан көрдөрөллөр, иһитиннэрэллэр эбит.
Куруук буоларын курдук, бу быыстапкаҕа «Айар» кыһа кинигэлэрэ үрдүк сыанабылы ыллылар уонна маннык ситиһиилэннилэр:
- "Лучшая учебная книга" номинацияҕа 1-с истиэпэннээх дьупулуом – "Одун Букварь" кинигэ.
- "Наука и инновации" номинацияҕа 1-кы истиэпэннээх дьупулуом – "Неизвестное солнце. Чудеса. Факты. Загадки. Расследования" кинигэ.
- "Культура и искусство" номинацияҕа 2-с истиэпэннээх дьупулуом – Мандар Уус "Узоры и орнаменты саха" кинигэтэ.
- "Лучшее краеведческое издание" номинацияҕа 3-с истиэпэннээх дьупулуом – "Иллюстрированная энциклопедия Республика Саха (Якутия)" кинигэ.
