Ону таһынан кыттааччылар ахсааннарын аччаттылар, итиэннэ саастарынан хааччахтааһыны киллэрдилэр.
Хамсыгынан сибээстээн Манчаары Оонньууларын балаһыанньатыгар уларыйыылар киирдилэр, ол туһунан социальнай ситимҥэ быһа эфир кэмигэр өрөспүүбүлүкэ успуордун миниистирин солбуйааччы Александр Бугаев иһитиннэрдэ.
Кыттааччылар ахсааннар аччаата уонна саастарынан хааччах киллэрилиннэ, диэн иһитиннэрдэ миниистири солбуйааччы, уларыйыылар чуолаан бу эрэ Спартакиаданы таарыйаллар диэн чорботон бэлиэтээтэ.
«Бары кыттааччыларга булгуччулаах ирдэбил – хамсыгы утары быһыыны ылыы. Бу бастатан туран спортсменнар бэйэлэрэ, тэрийээччилэр, волонтерадар, мэдиссиинэ үлэһиттэрэ – ол эбэтэр туох баар тэрээһиҥҥэ быһаччы кыттыгастаах дьон», - диэн иһитиннэрдэ Александр Бугаев.
Маны таһынан бары спортсменнар хамсыкка тиэст туттарыахтаахтар. Өскөтүн Спартакиада кэмигэр (5 күн устата) ким эмит кыттааччылартан эбэтэр тэрийээччилэртэн ыарыйдаҕына, бары кинини кытта ситимнэспит быһыыны ылбатах дьон күрэхтэһииттэн туоратылларга күһэйиллэллэр. Ол эрээри, ситимнээх киһи эрдэ быһыы ылбыт буоллаҕына, уонна этигэр-хааныгар дьаҥы утарар эттиктэрдээх буоллаҕына кини Манчаары Оонньууларыгар салгыы кыттар кыахтанар.
Миниистир бигэргэппитинэн, делегацияларга кэлэр дьон ахсаана хааччахтаах. Бастакы уонна иккис бөлөхтөргө өрөспүүбүлүкэ куораттара уонна бөдөҥ улуустара киириэхтэрэ, хас биирдиилэрэ 70 киһини туруоран (60 спортсмен уонна 10 делегат). Үһүс бөлөх – бу хотугу улуустар, кинилэртэн 50-ннуу киһи кыттыаҕа (40 спортсмен уонна 10 делегат). Арктика улуустара 40 – ннуу киһилээх хамаанданан туруохтара ( 30 спортсмен уонна 10 делегат).
Ону таһынан ветеран-спортсменнарга саастарынан хааччах көрүлүннэ – кинилэр саастара 55 сааһытттан улахана суох буолуохтаах.
Итиэннэ, Александр Бугаев оонньуулар буолуохтаах сирдэригэр, Горнай улууһугар успуорт эбийиэктэрэ тутулла туралларын туһунан сэһэргээтэ.
«Элбэх суолталаах успуорт саалатын Бэрдьигэстээх сэлиэнньэтигэр тутан олоххо киллэрдибит, түрүүбүнэтигэр тыһыынча миэстэлээх стадион уораҕайа тутулла турар. Көһө сылдьар түрүбүүнэлэри кытары онно түөрт тыһыынча олорор миэстэ баар буолуоҕа. Интернаттаах ытар тир тутулла турар уонна барытыгар барсар успуорт былассаакката тутулла турар, түрүбүүнэлээх, 150 миэстэлээх. Бу эбийиэктэр барыта Спартакиадаҕа туттулуохтара» - диэн билиһиннэрдэ бэлэмнэнии үлэтин туһунан миниистири солбуйаачча.
Национальнай успуорт көрүҥнэригэр XXI «Манчаары оонньуулара» быйыл сайын от ыйын 6 күнүттэн от ыйын 11 күнүгэр диэри Горнай улууһун Бэрдьигэстээх сэлиэнньэтигэр ыытыллыахтара. Бу оонньууларга түөрт бөлөҕүнэн 174 кэмпилиэк мэтээл оонньонуоҕа. Оонньуу бырагыраамматыгар – национальнай успуорт көрүҥнэригэр 11 күрэхтэһии ыытыллара күүтүллэр.
