Дьокуускай куорат былаастара дьэллик ыттары тутар пуун эбии филиалын тутаары гыналлар. Бу туһунан куорат дьаһалтатын пресс-сулууспата иһитиннэрэр.
"Помоги выжить" аһымал пуондатын уонна куораттааҕы дьэллик ыттары тутар пуун дириэктэрэ Екатерина Безрученко иһитиннэрбитинэн, ыттар ууһуур уорганнарын ыраастаабыттарын кэннэ, кыыллары 30 күн устата ичигэс дьиэҕэ тутуохтаахтар, оттон Дьокуускай тоһуттар тымныытыгар ыттары уулуссаҕа ыытан кэбиһэр сатамньыта суох. Инньэ гынан, ахсынньы, тохсунньу, олунньу ыйдарга ыттары уулуссаҕа ыыппаттар, ол иһин пууҥҥа баппат үлүгэрэ буолар. Ол иһин саҥа филиалы арыйаары гыналлар. Аны туран, бу пууҥҥа Намтан, Покровскайтан кытары аҕалаллар эбит. Билигин пууну тутарга сир учаастагын тыырыыга туһааннаах уорганнар үлэлэһэ сылдьаллар. Быйыл пуун нөҥүө 717 ыт ааспыт, олортон 176 ыты хаһаайыттар бэйэлэрэ аҕалбыттар, онтон 541 ыты туппуттар. "ОСВВ" бырагырааматынан (отлов-стерилизация-вакцинация-выпуск) 495 ыт ааспыт, онтон 317 ыт саҥа хаһаайыннаммыт.