Мииринэй аэропуорда - Дьокуускай куорат кэнниттэн Саха сиригэр иккис улахан салгын суолун аартыгынан буолар. Сыллата Мииринэй аэропуордун нөҥүө ортотунан 300 тыһыынча киһи айанныыр. Магандантан саҕалаан Иркутскайынан, Новосибирскайынан, Екатеринбурунан, Москубанан Санкт-Петербурга, Краснодарга тиийэ.Онон, салгын суола хайдах туруктааҕыттан Мииринэй оройуона улахан тутулуктаах. 2013 сыллаахха «АЛРОСА-Авиа» авиахампаанньа үөскээбитэ. 600-чэ сулууспалыыр дьонноох, 300 лүөччyктээх. 13 улахан көтөр ааллаах, 16 бөртөлүөттээх.Улахан ангардаах, аэронавигация тэрилтэлээх бөдөҥ хампаанньа.
Авиахампаанньа, алмаас хостуур производство, геология салааларыгар уонна пассажирдары тиэйиигэ үлэлиир. Саха сирин арҕаа өттүн сүрүн куоратыгар, аэробокзалы уонна пуорт балаһатын тутуу боппуруоһа турбута ыраатта. Санатан эттэххэ, Мииринэй куорат вокзалын, пуордун туруктара мөлтөх. Бу – 1978 сыл тутуута.
Эргэ аэровокзал сотору күрдьүллэр, көтүү балаhата уhатыллар диэбиттэрэ ыраатта.
Аэропуорт арҕаа эҥэрэ, «МИР» туруупка уонна «Водораздельные галечники» бириискэ алмаас дэлэй саппаастаах «тымырдарын» үөһэ сытар. Онон, пуорт арҕаа чааһа сабыллара уонна кини аттынааҕы дьоҕус бөһүөлэк көһөрө саарбахтаммат.
2020 сыл бүтүүтүгэр, Мииринэй аэропуордун тутуутугар балаһыанньаны “ыйдаҥардыах” сонуннары иһиттибит.
Мииринэй аэропуордун салайааччыта В.Нечаев “Алмаастаах кыраай” тэлэбиидьэннэтигэр иһитиннэрбитинэн, аэровокзал уонна балаһа тутуутун ииспирэйдээх боппуруоһа, дьэ өһүллүтэлээн эрэр эбит. Балаһыанньаны «Росавиация» бэйэтин тус хонтуруолугар ылбыт.
Сүҥкэн тутууга үс бэдэрээччит кыттыыны ылара былааннанар. Олор истэригэр Арассыыйа сиригэр үлэлиир гынан баран, Турцияҕа, Стамбул куоракка регистрациялаах тэрилтэ. Урут биллибитинэн, Мииринэй куорат хоту өттүнэн, буор көһөҥөлөрө дьапталҕаламмыт сирдэрин(отвалы) кыйа, саҥа аэровокзал туруохтаах сиригэр диэри аспаал суол тутуллуохтаах. Уһуна – биэс биэрэстэ буолуохтаах. Билиҥҥи көтүү балаһата илин диэки өссө эбии уһатыллыахтаах. Оччоҕо көтөр балаһа үс биэрэстэ уһуннаах буолар. Уруккута – 2,8 биэрэстэ.
Саҥа аэропуорт тутуутугар федеральнай киин уонна «АЛРОСА» хампаанньа үптэрэ туһаныллыахтаахтар. Быйыл вокзал уонна көтүү балаһатын тутуута төрдүс кыбаарталга саҕаланыахтаахтар диэбиттэрэ да, тэрээһин уонна аукцион уустуктарынан сэдиптээн, нөҥүө сылга көһөн турар.
Станислав Алексеев, Мииринэй куората.
Сэҥээриилэр