Мин кыра сылдьан мэник баҕайы оҕо үһүбүн. «Маннык гыннахпына хайыыр эбиттэрий» дии-дии өрө барарбын өйдүүбүн. Дьонум үлэлиир кэмнэригэр эбэм аахха сылдьарым. Кинилэргэ Коокочко диэн дьүлэй таайым оҕонньор баара. Оҕонньор күнү быһа тайаҕар өйөнөн оһох кэннинээҕи олоппоско олорон, утуйан тахсара.
Мин оскуолаҕа киирэр сылбар саҥа дьиэ туттан көстүбүт. Саҥа дьиэбит уһаайбатын сэбиэт сатаан үллэрбэккэ айдааннаах соҕус буолбут. Ийэм кыһыл оҕолоох буолан атын хоско сытар, мин аҕабын кытта атын хоско утуйабыт. Мин хос ааныгар утары турар тимир ороҥҥо сытабын. Арай түүн ортото тиритэн аҕай уһуктан кэллим. Көрбүтүм оһох икки, ыскаап икки ардыгар миэхэ уун утары улахан баҕайы муус маҥан киһи тунааран турар. Киһи да диэххэ сөбө суох. Киһитинэн киһи эрээри, улахан маҥан салгын курдук. Хайдах-хайдаҕый диэммин харахпын симэ-симэ астым, киһим син биир турар, хамсаабат. Лаппа уһуктан харахпын илиибинэн ньухханным. Мин бар-бар дии-дии илиибинэн далбаатаан үүрэбин. Ол тухары киһим турар. Куттанаммын ытаатым, аҕам уутун быыһынан мин ороммун бэйэтигэр сыһыары тарта. Хойут ону «Ыалбыт Доропуун оҕонньор дууһата айдааны сөбүлээбэккэ көстүбүтэ буолуо» диэн ийэм сылыктаабыта.
Эмиэ ол күһүн быһыылааҕа. Эһэм аах эргэ дьиэлэригэр биир сыл аҕа эдьиийбин кытта оонньуу киирдибит. Дьиэҕэ ким да суох. Бары оттуу барбыттар. Урукку дьон туппут дьиэлэрэ олус үрдүк, икки аан хостоох, икки оһохтоох олус улахан. Эдьиийим остуолга олорон тугу эрэ уруһуйдуур, мин оччотооҕуттан сиэркилэ иннигэр эргичиҥнээбит аҕай бэйэм эмиэ сиэркилэ иннигэр турабын. Эдьиийим куорат кыыһа. Кини массажкатынан баттахпын тараанабын. Оччолорго массажканы саҥа көрбүтүм, наһаа сөбүлээбитим. Биһиги дьиэбитигэр ардьайбыт, онон-манан тостубут тараахтар эрэ бааллара. Арай аттынааҕы хоско тимир орон хаахынаата. Ким эрэ баар быһыылаах диэммин хоһу өҥөйөн көрдүм — ким да суох. Тугу эрэ сыыһа иһиттим быһыылаах, күрүлүүр күнүс туох абааһыта кэлбит үһү диэн салгыы ыллыы-ыллыы тараанарбын кубулуппатым. Арай киһи ынчыктыыр уонна ыарахан баҕайытык тыына-тыына оронтон турар тыас иһилиннэ. Мин сарылыы түстүм да таһырдьа ойдум, эдьиийим кэннибиттэн буулдьа кэриэтэ ыстанан таҕыста. Күүлэни куттана-куттана маһынан баттаппыппыт. Кэлин кэпсээбиттэринэн биһиги тыаһы истиэхпит хас да сыл иннинэ эбэм уһун ыарахан ыарыыттан ол ороҥҥо сытан өлбүт, тыаһа салгыҥҥа хаалан хаалбыта буолуо диэн сылыктаабыттара.
Светлана Тимофеева.
