Ураты оҥоһуулаах дьааһыла тутуута саҕаланна

05.10.2012 16:31 | Автор: Кыым | Көрдүлэр: 2021   
Печать

5555_copy_copy_copy_copy_copyДьоллоох Дьокуускай куораппытыгар Дзержинскэй аатынан уулуссаҕа ураты оҥоһуулаах дьааһыланы тутан эрэллэр. Тоҕо ураты диир буоллаххытына, “блочно-модульнай” ньыманан тутуллар. Онон номнуо бэлэм дьиэҕэ эбии тутууну ыытыахха сөп. Атын дойдуларга маннык бырайыагынан туппуттара быданнаата. Бу ньыма биһиги усулуобуйабытыгар даҕаны барсар.

Саҥа дьааһыла “Оҕо саас куората” диэн сүрэхтэннэ. Бу дьааһыла биир сүрүн, биһирэнэр уратыта – аллараа этээстэрэ кыра саастаах оҕолорго ананар. Ыал олорор дьиэлэрин кытта сыста турар былааннаах. Итиэннэ сүрдээх киэҥ гына былааннаммыт. Биир салаатыгар 400-500 оҕо батар кыахтаах. Саҥа дьааһылаҕа оҕолорго анаан аныгы олох ирдэбилигэр эппиэттиир, оҕону оскуолаҕа бэлэмниир кылаастар, спорт уонна үҥкүү киэҥ саалалара бааллар. Маны таһынан тыйаатыр устуудьуйалаах уонна дьэрэкээн кыһыҥҥы саадынан киэркэйиэҕэ.

Маҥнайгы сыбаайаны түһэрии үөрүүлээх тэрээһинэ бу ый 27 күнүгэр буолла. Үгэс быһыытынан, микрооройуон олохтоохторун куораппыт дьаһалтатын баһылыга Айсен Николаев уонна үөрэх  миниистирэ Афанасий Владимиров эҕэрдэлээтилэр. Итиэннэ бу үөрүүлээх тэрээһиҥҥэ дьааһыла тутуутунан дьарыктаныахтаах МУТ “АРТ” (“Агентство по развитию территорий”) салайааччыта Владимир Кожевников кытынна. Бу тэрилтэ хамсатыылаах көмөтүнэн куораппытыгар 36 кыбартаалга “Остров сокровищ” уонна Ильмень аатынан уулуссаҕа “Кэскил” дьааһылалар тутуллан, хайыы-үйэ үлэҕэ киирбиттэрэ