Гараас миэстэтин сокуоннайдык бигэргэтии

04.10.2012 17:29 | Автор: Кыым | Көрдүлэр: 2049   
Печать

images_copyКуорат олохтоохторо тимир көлөлөрүн угар гараастара төбө ыарыыта буолбута ыраатта. Дьиэлэриттэн чугас сири сокуонунан докумуоннаһар биллэр ыарахаттардаах. Сороҕор ону кыайан ситиспэккэ, сирдэрин былдьатар түбэлтэлэрэ да баар. Билигин Дьокуускай куорат дьаһалтата олохтоохторго гараас миэстэтин сокуоннайдык бигэргэтэргэ үлэлээн эрэр. Бастатан туран, докумуоннанар учаастак дьоҥҥо, массыына сылдьарыгар туох да мэһэйи оҥоруо суохтаах. Сири бас билии иһин сыл аайы 5 тыһ. 490 солк. нолуок төлүүгүн.

Аҕа дойду сэриитин бэтэрээннэригэр уонна доруобуйаларынан хааччахтаах дьоҥҥо 25 % чэпчэтии көрүллэр. Төлөбүрүн сонно уу харчынан эрэ буолбакка, хайа баҕарар баан салаатыгар тиийэн төлүөххэ сөп. Кибитээнсийэни олорор түөлбэҕит дьаһалтатыттан ылаҕыт.

Хас биирдии уокурукка суот-учуот үлэтэ тэриллибитэ. Онон номнуо миэстэ ылан турар гараастар куорат хаартатыгар киирбиттэрэ. Оттон табыгаһа суох миэстэҕэ турар гараастары хайа сиргэ көһөрүөххэ сөбүн быһаарбыттара. Ити чэрчитинэн 202 микрооройуону тупсарар бырайыак оҥоһулунна. Онно саҥа тутуллар 203 микрооройуон диэки сытар ырааһыйаны гараас турарыгар анаатылар.

Губиннааҕы уокурук салайааччыта Любовь Саввина:

– Гарааһы туруорар сири быһаарарга нэһилиэнньэ санаата, олохтоох киһи этиитэ барыта учуоттанар. Олохтоохтор сынньанар, оҕо оонньуур былаһааккаларын мэһэйдиэ суохтаах. Көҥүлэ суох турар гараас баар буоллаҕына, хаһаайын үтүө көҥүлүнэн ити итэҕэһи туораппат түгэнэ үөскээтэҕинэ, куорат таһыгар анаммыт сиргэ көһөрөр бырааптаахпыт. Итиэннэ ол көһөрүү ороскуотун хаһаайын бэйэтэ уйунар. Бу туһунан киин куорат дьаһалтатын уопсастыбаннаһы уонна СМИ-ни кытары үлэҕэ департамена быһаарар.