Ити сырыыбытыгар нэһилиэк дьаһалтатын ыксаллаах быһыыга-майгыга исписэлииһэ Кирилл Иванову кылгас кэмҥэ көрсөн ааспыппыт. Кирилл Викторович араассыйата тохтоло суох хардьыгыныыра, ыҥырара. Онон кылгас кэпсэтиибит үстэ-түөртэ тохтуу-тохтуу салҕаммыта.
– Уопсайа 32 дьиэ умайда, – диэн саҕалаабыта Кирилл Викторович. – Киһи көһүппэтэх өттүттэн алдьархай таҕыста. Мастар төбөлөрүн сии-сии куугуначчы барар уот. Ол уот, иһиттэххэ Бүлүү улууһун сиригэр-уотугар тиийбит. Эбиитин ити күн силлиэ тыал түспүтэ. Сэлиэнньэ тулатыгар ханааба, баһаарынайдар өйдөбүллэринэн эттэххэ “минерализованнай балаһа” баара да – уот онтон иҥнибэтэҕэ. Тыал да күүһэ бэрт, уот да күүһэ бэрт... Онон силлиэ тыал уоту олох үөһэнэн быраҕаттаабыта.
Ыаллар кыбыыларыгар баар кэбиһиилээх оттор эбиилик буолбуттара быһыылаах. Уот дьиэлэр быыстарынан киирэ-киирэ бастаан кэбиһиилээх оттору күл-көмөр оҥортообута. Онтон уонунан дьиэ биир кэмҥэ күлүм гына умайан күүдэпчилэнэн, киһи тиийиммэт-түгэммэт балаһыанньата үөскээбитэ. Итиннэ баар уолаттар кыахтара баарынан сүүрэ-көтө сатаабыттара да уот кыайтарбатаҕа. Уу оботторуутугар эҥин эмиэ иэдэйбиппит. Оҕолор, дьахталлар, кырдьаҕастар эрдэ эвакуацияламмыттара. Онон ити түөлбэҕэ эр дьон уонна аҕыйах дьахтар хаалбыта.
Билигин да сэлиэнньэбит тулатыгар көрдүгэннии, буруолуу сытар учаастактар элбэхтэр. Дьон сүрэх бааһа буолбута бэрт буолан кыра да буруоҕа, уокка айманаллар. Ол учаастактарга уу баһар массыыналары, дьону ыыталыыбыт. Нэһилиэк дьоно булуук суолун бата суукканан дьуһуурустубалыыллар. Билигин сайылыктарга булууктааһын үлэтэ ыытыллыахтаах.
Урукку да өттүгэр ойуур баһаардара буолаллара, син бэйэбит күүспүтүнэн бөрөнөн олорбуппут. Оттон быйыл олох ураты сайын буолла. Кураана да бэрт, сир-дойду барыта куурбута-хаппыта да бэрт. Уот түстэҕинэ олох күлүбүрэччи умайбытынан барар.
Нэһилиэк дьоно от ыйын 26 күнүттэн наар ойуур баһаарыгар сырыттылар. Быыһыгар-ардыгар оттуу сатаатылар да итиччэ үлүгэр уокка, буруоҕа туох үлэтэ тахсыылаах буолуой?! Ойуур эрэ буолбакка ходуһалар кытыылара эмиэ умайдылар. Хайдах кыстык буолар?! Өрөспүүбүлүкэбит бырабыыталыстыбата көмөлөстөҕүнэ эрэ арыый “һуу” диир инибит.
Ил Дархан да, СӨ бырабыыталыстыбатын хамыыһыйалара да – дьон санаатын көтөхтүлэр. “Көмүскэллээхпит, алдьархайга соҕотох хаалбатахпыт” диэн өйдөбүл дьоҥҥо киирэн эрэр. Умайбыт түөлбэҕэ үлэ саҕаламмытынан барбыта. Билигин онно элбэх тиэхиньикэ үлэлии сылдьар, ыраастааһын үлэтэ ыытыллар.
Бастаан утаа улахан аймалҕан, паника буоллаҕа. Отут икки ыал биирдэ дьиэтэ-уота суох буолан хаалара ыарахан көстүү.
Федор РАХЛЕЕВ.