Соторутааҕыта, «Саха» КИНХ быһа биэриигэ ыытыллыбыт «Дьол түһүлгэтэ» 9-с республикатааҕы сүүйүүлээх оонньуу биһиги кыыспытыгар бааттаах буолла. Санатан эттэххэ, манна тоҕус массыына оонньоммута. Ньургуяна Игорьевна Пономарева, Сааскылаах аэропортугар хаһаайыстыбаннай чааһын сэбиэдиссэйэ. 27 саастаах, олохтоох бэйэбит эдэркээн кыыспыт. Билиэти, кини ийэтэ Ньургуйаанаи төрөөбүт күнүгэр бэлэх быһыытынан атыылаһан ылан биэрбит.
- Им Туйаара атыылыы сылдьарыттан ийэм биир билиэти ылбыт этэ. Урут наар бытархайы сүүйээччибин, улаханы сүүйэ илигим. Субуотаҕа Сунтаарга самолетунан айаннаан кэлбитим. Дьүөгэбэр кэлэн киэһээҥҥи аһылыгы аһыы олордохпутуна арай телефоммар эрийбиттэрэ: «Дорообо, массыына ыытар бырааптааххын дуо... Эһиги «Тойота АКСИО» диэн массыынаны сүүйдүгүт!» - диэбиттэрэ ыытааччылар. Мин долгуйаммын саҥарар да кыаҕым суох этэ, хата баһыыбалаабытым
Массыынаны иллэрээ күн аҕам Игорь Михайлович баран ылбыта. Туймаада стадиоҥҥа дьоллоох сүүйээччилэргэ тоҕус массыынаны туттарбыт этилэр. Онно баран ылбыта. Аны массыына ыытарга үөрэниэм, куоракка сайын хаалларыахпыт диэн былаанныыбыт. Аймахтарым, дьүөгэлэрим эҕэрдэлээбиттэрэ аҕай. Тэрийээччилэргэ, ыытааччыларга махталбын тиэрдэбин. Лотереяны ылыҥ, эмискэччи дьол тосхойуон сөп эбит, киһи ыра санаалаах буолара үчүгэй!”
Эдэркээн кыыспытын эҕэрдэлиибит, дьоллоох түгэннэр өссө да тосхойо турдуннар!
«Анаабыр уоттара» Инстаграмм социальнай ситимиттэн