Өлүөхүмэ улууһугар былырыын ыам ыйыгар өрүскэ сынньана, балыктыы диэн хампаанньаннан тэриллэн барбыттар. Бары балыктыы сырыттахтарына, биир аҕа 11 саастаах уолугар "кулуһуҥҥа маста хомуйан кэл" диэн сорудахтаабыт.
Уол суол кытыытыгар мас хомуйа сырыттаҕына, эмискэ эр киһи саба түспүт уонна күүһүлүү сатаабыт. Уолчаан улаханнык утарылаһан, хаһыы-ыһыы бөҕө түһэрбит. Инньэ гынан, матасыыкылынан ааһан иһэр киһи бэлиэтии көрөн, көмөҕө тиийбит. Күүһүлүү сатаабыт киһийдэх онтон үргэн атахха бэрдэрбит. Уолчаан аҕатыгар туох буолбутун сиһилии кэпсээбит, саба түспүт киһини туппуттар. Билигин кини суут уурааҕынан өр сылга күлүүс хаайыытыгар утаарыллыбыт.
Бу быһылаан хомолотолоохтук, олус хобдохтук түмүктэниэхтээх этэ. Дьолго, кулууп дириэктэрэ Алимпий Николаев бэлиэтии көрөн, барыта этэҥҥэ түмүктэннэ. Киниэхэ уолчаан дьоно эрэ буолбакка, силиэдэбэтэллэр эмиэ махтаналлар. Саха сирин силиэстийэлиир управлениета Алимпий Борисовичка олунньу 17 күнүгэр, улуус дьаһалтатыгар үөрүүлээх быһыыга-майгыга бочуотунай грамотаны туттарда. Наҕарааданы Өлүөхүмэ улууһун силиэстийэлиир салаатын салайааччы Иван Гоголев туттарбыт.
Алимпий Борисович бэйэтин туһунан кэпсэнэ сылдьыбат, бэрт сэмэй кэмэлдьилээх хорсун киһи. Кини "мин оннубар ким баҕарар маннык дьаһаныа этэ" диир. Маннык хорсун дьонноох буоламмыт, киртэн-хохтон тэйэн эрдэхпит. Дьоруойга махтал мааныта буоллун!
