Сытыы ис хоһоонноох «Золото» диэн сэрийээл премьерата бэҕэһээ НТВ ханаалга, биһиги бириэмэбитинэн 20.00 чааска буолбут. Манна саха артыыстара Петр Баснаев уонна Василий Борисов кыттыыны ылбыттарын туһунан ЯСИА саайтыгар суруллар.
Саха тыйаатырыгар иһитиннэрбиттэринэн, Арассыыйа үтүөлээх артыыһа Петр Баснаев уонна Саха Өрөспүүбүлүкэтин үтүөлээх артыыһа Василий Борисов бу Александр Касаткин хас даҕаны сериялаах криминальнай детективыгар уһуллубуттар. Сэрийээл сүрүн дьоруойдарын оруолларын Арассыыйа үтүөлээх артыыһа Евгений Дятлов уонна тыйаатыр, киинэ эйгэтин эдэр артыыһа Илья Антоненко толорбуттар.
Сэрийээл ис хоһоонун сырдатар буоллахха, Илин Сибиир ситэ үөрэтиллибэтэх оройуонугар, МГУ геофагын устудьуона «Алай золото» улахан хампаанньатыгар стажировкатын бара кэлэр. Бу сорук кини үрдүк үөрэҕин кыһатыттан үүрүллүбэтин туһугар бүтэһик эрэлинэн буолар эбит.
Эдэр уол кырачаан бөһүөлэккэ кэлэр уонна олохтоох аптарытыаттаах киһини Антону көрсөр. Кини сокуону кэһэн туран, бу сиргэ-уокка дьиҥнээх былааһы тутан олорор киһинэн буолар эбит. Сотору кэминэн, 21 саастаах устудьуон стажировката хомолтолоохтук түмүктэнэр: кини көрөн турдаҕына, настаабынньыгын өлөрөллөр, оттон уол бэйэтэ нэһиилэ быыһанар.
Сэрийээлгэ Евгений Дятлов, Илья Антоненко, Екатерина Волкова, Бесо Гатаев, Ольга Мукукенова, Алексей Шевченков, Анастасия Матвеева, Анастасия Цой, Фархад Махмудов, Анастасия Светлова, Константин Снегов, Нелли Цай уо.д.а. уһуллубуттар.
