Сарсын, атырдьах ыйын 10 күнүгэр, Саха сиригэр ойуур баһаардарын умулларыыга атын эрэгийиэннэртэн 67 баһаарынай эби көмөҕө кэлиэҕэ. Бу туһунан Ил Дархан уонна бырабыыталыстыба дьаһалтатын пресс-сулууспата иһитиннэрэр.
Ити туһунан эрэгийиэннээҕи суһал ыстаап мунньаҕар зампред Дмитрий Саловников кэпсээбит. Ол курдук, Коми, Карелия өрөспүүбүлүкэлэриттэн, Архангельскай уонна Мурманскай уобаластартан исписсэлиистэр ордук куттал суоһуур учаастактарыгар үлэлиэхтэрэ.
Күн-бүгүн Саха сиригэр 4097 киһи уонна 584 тиэхиньикэ 72 баһаары умуллараллар. Ону таһынан Миноборона байыаннай тиэхиньикэтэ уонна 128 байыаннай кэлэн үлэлии сылдьаллар.